1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

اسرائیلی شہر ایلات پر حملے، عالمی برداری کی شدید مذمت

19 اگست 2011

جنوبی اسرائیل پر ہونے والے متعدد حملوں میں ایک اسرائیلی فوجی سیمت کم ازکم سات افراد ہلاک ہو گئے۔ امریکہ سمیت عالمی برادری نے ان حملوں کی شدید مذمت کی ہے جبکہ اسرائیلی جوابی کارروائی میں چھ فلسطینییوں کو ہلاک کردیا گیا۔

https://p.dw.com/p/12JJy
تصویر: dapd

جمعرات کو جنوبی اسرائیلی علاقے ایلات میں ہوئے ان حملوں کے بعد اسرائیلی فوج نے غزہ جنگجوؤں پر جوابی حملہ بھی کیا۔ اسرائیلی دفاعی افواج کے مطابق کچھ مسلح حملہ آوروں نے دو بسوں پر فائرنگ کی، جس کے کچھ گھنٹوں بعد بم دھماکے بھی ہوئے۔ بعد ازاں اسرائیلی فوج نے حملہ آوروں کا سراغ لگا کر انہیں ہلاک کر دیا۔ بتایا گیا ہے کہ حملہ آوروں کی تعداد سات تھی۔

اس پر تشدد کارروائی کے بعد اسرائیلی فضائیہ نے غزہ میں جنگجوؤں کے ٹھکانوں کو نشانہ بھی بنایا۔ اسرائیل نے ایلات میں ہونے والے حملوں کی ذمہ داری غزہ میں موجود جنگجوؤں پر عائد کی ہے۔ رفاہ طبی ذرائع کے مطابق اسرائیلی فضائیہ کی کارروائی کے نتیجے میں چھ افراد مارے گئے۔ بتایا گیا ہے کہ اسرائیلی فضائیہ نے عسکری تنظیم PRC کے چار اہم رہنماؤں کو بھی ہلاک کر دیا۔

اسرائیلی وزیر اعظم بینجمن نیتن یاہو نے ان حملوں کے کچھ دیر بعد اپنے ایک نشریاتی خطاب میں کہا،’ اگر کوئی اسرائیل کو نقصان پہنچائے گا تو ہم فوری اور سخت جواب دیں گے۔ جنہوں نے اسرائیلیوں کی ہلاکت کا حکم دیا تھا، ان میں سے اب کوئی بھی زندہ نہیں ہے‘۔

Flash-Galerie Israel Anschläge
جنوبی اسرائیل پر ہوئے حملے کی عالمی برداری کی سطح پر شدید مذمت کی گئی ہےتصویر: dapd

جرمنی سمیت عالمی برادری نے اسرائیل پر ہوئے ان دہشت گردانہ حملوں کی سخت مذمت کی ہے۔ وائٹ ہاؤس کی طرف سے جاری کیے گئے ایک بیان میں ان حملوں کو بہیمانہ دہشت گردانہ کارروائی قرار دیا گیا جبکہ امریکی وزیر خارجہ ہلیری کلنٹن کے نے ان حملوں کو بزدلانہ عمل سے تعبیر کیا ہے۔ اقوام متحدہ کی سیکریٹری جنرل بان کی مون نے بھی ان حملوں کی مذمت کرتے ہوئے خطے میں بڑھتی ہوئی کشیدگی پر سخت تشویش ظاہر کی ہے۔

اطالوی وزیر اعظم سلویو بیرلسکونی نے اپنے اسرائیلی ہم منصب نیتن یاہو کے نام اپنے پیغام میں کہا کہ تکلیف کے ان لمحات میں وہ خود کو اسرائیلی عوام کے قریب محسوس کرتے ہیں،’ اس نفرت انگیز جرم کے بعد اسرائیل کے لیے ہماری محبت میں مزید اضافہ ہوا ہے‘۔

یورپی یونین کی خارجہ امور کی سربراہ کیتھرین ایشٹن نے اسرائیل میں ہوئے سلسلہ وار حملوں پرتشویش ظاہر کرتے ہوئے کہا کہ وہ اس طرح کے تمام دہشت گردانہ حملوں کی مذمت کرتی ہیں۔

رپورٹ: عاطف بلوچ

ادارت: عابد حسین

اس موضوع سے متعلق مزید سیکشن پر جائیں

اس موضوع سے متعلق مزید

مزید آرٹیکل دیکھائیں