اسپین اور مراکش میں چار جہادیوں کی گرفتاری

یہ آپریشن شمالی افریقہ میں خودمختار ہسپانوی عملداری کے علاقے سیتہ (Ceuta) اور مراکش کے ساحلی مقام الناظور (Nador) میں کیا گیا اور ایسے چار افراد کو گرفتار کیا گیا، جو شام، عراق اور لیبیا میں سرگرم دہشت پسند گروپ ’اسلامک اسٹیٹ‘ کے لیے ممکنہ جہادیوں کی بھرتی کا سلسلہ جاری رکھے ہوئے تھے۔

ہسپانوی اور مراکشی وزارتِ داخلہ کے مطابق یہ افراد جہادیوں کی بھرتی مکمل کر کے اُن سے مراکش اور اسپین میں دہشت گردانہ حملے کروانے کی پلاننگ کر رہے تھے۔ ہسپانوی سکیورٹی حکام رواں برس کے دوران کم از کم ایک درجن افراد کو ’اسلامک اسٹیٹ‘ کے ساتھ تعلق اور رابطوں کے شبے میں حراست میں لے چکے ہیں۔ یہ مشترکہ آپریشن اپنی نوعیت کا پہلا آپریشن ہے، جس میں مراکشی اور ہسپانوی سکیورٹی اہلکار شریک تھے۔

یہ امر اہم ہے کہ سن 2015 میں اسپین میں ایسے 102 افراد کو گرفتار کیا گیا تھا جن پر حکام کو شبہ تھا کہ وہ عسکریت پسند تنظیم ’اسلامک اسٹیٹ‘ کے ساتھ رابطے رکھے ہوئے ہیں۔ اسی طرح سن 2014 میں میڈرڈ حکومت نے 204 سے زائد افراد کو اِسی شبے میں گرفتار کیا تھا۔ ہسپانوی حکام ایسے افراد کی بھی گرفتاریوں کا سلسلہ جاری رکھے ہوئے ہے، جو دہشت گرد اور مجرمانہ کارروائیوں میں ملوث کاالعدم کردستان ورکرز پارٹی کے ساتھ رابطے رکھتے ہیں۔ اب تک کرد عسکری تنظیم کے ساتھ رابطے میں نو افراد حرست میں لیے جا چکے ہیں۔

سیتہ دو مراکشی ساحلی علاقوں میں سے ایک ہے، جس پر ہسپانوی عملداری قائم ہے۔ دوسرے مقام کا نام ملیلہ (ہسپانوی میں ملییا) ہے۔ ان دونوں علاقوں میں ہسپانوی سکیورٹی اہلکار انسداد عسکریت پسندی کی خصوصی مہم جاری رکھے ہوئے ہیں۔ ہسپانوی پولیس اور خفیہ اداروں کے اہلکار سیتہ اور ملیلہ میں خود ساختہ جہادیوں کا ہر ممکنہ سراغ لگا رہے ہیں۔ گزشتہ برس ہسپانوی حکام نے دعویٰ کیا تھا کہ اُنہوں نے سیتہ میں جہادیوں کے ایک ایسے نیٹ ورک کو توڑ دیا تھا جو اسپین اور یورپ میں دہشت گردانہ حملے کرنے کا منصوبہ بنائے ہوئے تھا۔