افغانستان میں طالبان کی کارروائیوں میں اضافہ؟

افغانستان میں نیٹو کے 65 ہزار فوجی اہلکار طالبان عسکریت پسندوں کے خلاف لڑ رہے ہیں جن میں سے 31 ہزار امریکی ہیں۔ اس مغربی فوجی اتحاد میں آٹھ ہزار سے زائد فوجیوں کے ساتھ برطانیہ دوسرے نمبر پر ہے۔

لیکن پھر بھی اس لڑائی کا یہ پہلو حیرت انگیز ہے کہ گزشتہ چھ ماہ کے دوران افغان سرزمین پر لڑائی میں ہلاک والے فوجیوں میں زیادہ تر برطانوی فوجی تھے۔

افغانستان میں 2001 سے طالبان عسکریت پسندوں کے خلاف جاری لڑائی میں 40 ممالک حصہ لے رہے ہیں۔ اس عرصے میں فوجی ہلاکتوں میں امریکہ پہلے اور برطانیہ دوسرے نمبر پر رہا ہے۔ تاہم گزشتہ کچھ عرصے میں امریکہ کے مقابلے میں برطانوی فوجیوں کی ہلاکتوں میں اضافہ دیکھنے میں آیا ہے۔ تقریبا آٹھ سال سے جاری اس لڑائی میں ہلاک ہونے والے برطانوی فوجیوں کی تعداد 133 ہے جبکہ اس عرصے میں 629 امریکی فوجی ہلاک ہوئے ہیں۔

47 برطانوی فوجی صرف 2007 میں ہلاک ہوئے جبکہ امریکی اور برطانوی فوجی ذرائع کے مطابق نومبر کے آغاز سے افغانستان میں تین امریکی فوجیوں کے مقابلے میں 12 برطانوی فوجی ہلاک ہوئے۔

دوسری جانب طالبان عسکریت پسندوں کی جانب سے مزاحمتی کارروائیوں میں بتدریج شدت آرہی ہے۔ اس بات کا اعتراف خود امریکی صدر جارج ڈبلیو بش نے بھی کیا ہے۔

اپنے حالیہ دورہ افغانستان میں انہوں نے کہا کہ طالبان، افغان عوام پر مظالم ڈھاتے رہے ہیں اور ان کے خلاف پیش رفت سے انکار نہیں کیا جا سکتا۔ " میں نے یہ کبھی نہیں کہا کہ طالبان کا خاتمہ ہو گیا ہے، میں نے تو صرف یہ کہا کہ انہیں اقتدار سے ہٹایا گیا ہے۔"

افغانستان میں نیٹو افواج کے ترجمان کے مطابق طالبان عسکریت پسند لڑائی میں نئے نئے ‌حربے استعمال کر رہے ہیں لیکن برطانوی فوجیوں کے ہلاکتوں میں اضافے کی کوئی ایک وجہ نہیں ہے۔

برطانوی بحریہ کے کیپٹن مارک ونڈسر کا کہنا ہے: "گزشتہ چند ہفتوں سے برطانوی فوجی دشمن کے ساتھ سخت مقابلہ کر رہے ہیں۔ اس طرح دشمن سے سامنا تو ہوگا ہی۔ یہ برا وقت رہا ہے۔‘‘

برطانوی فوج پر یہ تنقید بھی کی جاتی ہے کہ افغانستان میں وہ اچھی بکتر بند گاڑیاں استعمال نہیں کر رہے۔ تاہم ریٹائرڈ برطانوی کمانڈر کرنل باب اسٹیورٹ کے مطابق برطانوی فوج کو آبادی والے علاقے میں جانا پڑے تو خطرہ زیادہ ہی رہے گا۔