افغان صوبے کنڑ میں خود کش بم حملہ، دس افراد ہلاک

جلال آباد سے ہفتہ ستائیس فروری کو ملنے والی نیوز ایجنسی اے ایف پی کی رپورٹوں کے مطابق حکام نے بتایا کہ اس واقعے میں ایک موٹر سائیکل پر سوار حملہ آور نے ہفتے کی صبح خود کو اسد آباد کی ایک مصروف مارکیٹ میں دھماکے سے اڑا دیا۔

صوبائی گورنر کے ترجمان غنی مصمم نے اے ایف پی کو بتایا کہ اس دھماکے میں کم از کم دس افراد ہلاک ہوئے جبکہ زخمیوں کی تعداد کم از کم بھی چالیس سے زائد بتائی گئی ہے۔ اس کے برعکس کنڑ میں صوبائی پولیس کے نائب سربراہ سید مقصود پاچا نے بتایا کہ اس حملے میں مرنے والوں کی تعداد گیارہ ہے۔

مختلف نیوز ایجنسیوں کی رپورٹوں کے مطابق ابھی تک کسی بھی مسلح گروپ نے اس خود کش حملے کی ذمے داری قبول نہیں کی۔ تاہم ماضی میں ایسے تقریباﹰ سبھی بم حملوں کی ذمے داری ان طالبان عسکریت پسندوں کی طرف سے قبول کی جاتی رہی ہے، جو گزشتہ 14 برسوں سے کابل حکومت کے خلاف اپنی مسلح مزاحمت جاری رکھے ہوئے ہیں۔

اے یف پی کے مطابق یہ حملہ افغانستان میں حالیہ دنوں میں کیے جانے والے بڑے ہلاکت خیز حملوں میں سے ایک ہے۔ آج کا یہ بم دھماکا ایک ایسے وقت پر کیا گیا، جب کہ اگلے ہفتے کابل حکومت اور افغان طالبان کے مابین براہ راست امن مذاکرات کا آغاز بھی طے ہے۔

اسد آباد میں آج کے خود کش حملے کے ایک عینی شاہد نے اپنی شناخت ظاہر نہ کرنے کی شرط پر اے ایف پی کو بتایا کہ موٹر سائیکل سوار خود کش حملہ آور کا ہدف کنڑ کی ایک بہت بااثر قبائلی شخصیت حاجی خان جان تھی۔ اس دھماکے میں مارے جانے والوں میں حاجی خان جان بھی شامل ہے۔

عینی شایدہن کے بقول حاجی خان جان نامی قبائلی رہنما ماضی میں کنڑ میں طالبان عسکریت پسندوں کے خلاف ایک مقامی لیکن کامیاب مسلح مزاحمت کے قیادت بھی کرتا رہا تھا۔ کنڑ افغانستان کا ایک ایسا دور افتادہ صوبہ ہے، جس کی طویل سرحد پاکستان کے ساتھ ملتی ہے۔

ماضی میں کابل حکومت پاکستان پر یہ الزام بھی لگاتی رہی ہے کہ افغانستان سے جو طالبان شدت پسند پاکستان جا کر وہاں اپنے مبینہ محفوظ ٹھکانوں میں روپوش ہو جاتے ہیں، ان میں سے بہت سے کنڑ کی سرحد پار کر کے ہی پاکستان جاتے ہیں۔

افغانستان میں قیام امن کی کوششوں کے لیے ابھی گزشتہ ہفتے ہی کابل میں افغان، چینی، امریکی اور پاکستانی نمائندوں کا ایک اجلاس بھی ہوا تھا، جو اپنی نوعیت کا چوتھا مذاکراتی اجلاس تھا، اور جس کا مقصد ایک ایسے طریقہ کار کا تعین تھا، جو افغانستان میں قیام امن کے عمل کو تقویت دے سکے۔