بائرن میونخ بنڈس لیگا کی سر فہرست ٹیم

بنڈس لیگا کے چوتھے میچ ڈے کے دوسرے دن چھ میچ کھیلے گئے۔ بائرن میونخ نے کائزرزلاؤٹرن کو صفر کے مقابلے میں تین گول سے ہرا دیا۔ قومی ٹیم کے اسٹرائیکر ماریو گومیز نے اس جیت میں اہم کردار ادا کیا۔ انہوں نے ہی تینوں گول اسکور کیے۔ وقفے تک میونخ کی جانب سے محض ایک گول کیا گیا تھا۔

بریمن نے ہوفن ہائم کو دو ایک سے شکست دی ہے۔ فرائی برگ نے وولفس برگ کو تین صفر سے مات دی ہے۔ نیورمبرگ نے آؤگسبرگ کو ایک صفر سے ہرایا ہے۔ دفاعی چیمپیئن ڈورٹمنڈ اور لیورکوزن کے درمیان میچ بغیر کسی گول کے ڈرا ہو گیا۔

کولون کو اس سیزن کی پہلی فتح ملی ہے۔ اس نے ہیمبرگ کو تین کے مقابلے میں چار گول سے ہرایا۔ جمعہ کو اس لیگ کے درجہ اوّل میں پہنچنے والی برلن کی ٹیم نے شٹٹ گارٹ کو صفر کے مقابلے میں ایک گول سے ہرایا تھا۔

ڈورٹمنڈ چار میچ ڈیز کے بعد چوتھے نمبر پر ہے۔ اسے سات پوائنٹس حاصل ہیں۔ اتوار کے مقابلوں کے بعد ٹاپ پوزیشنوں میں پھر سے تبدیلی کا امکان ہے۔ ہفتہ کو ریکارڈ ساز فٹ بال کلب بائرن میونخ نے پہلی پوزیشن حاصل کی، تاہم اتوار کو مؤنشن گلاڈ باخ شالکے کے خلاف میچ جیت گئی تو اسے یہ پوزیشن پھر سے حاصل ہو جائے گی۔

مؤنشن گلاڈ باخ کو اوّل نمبر پوزیشن گزشتہ ہفتے ہی ملی تھی، لیکن اس وقت وہ تیسرے نمبر پر ہے۔

دوسری پوزیشن نو پوائنٹس کے ساتھ بریمن کو حاصل ہے۔ ڈورٹمنڈ، ہینوور اور لیورکوزن بالترتیب چوتھے، پانچویں اور چھٹے نمبر پر ہیں۔ تیسرے سے چھٹے نمبر کی تمام ٹیموں کے پوائنٹس سات سات ہیں۔

بنڈس لیگا میں آئندہ ہفتے کوئی میچ نہیں ہو گا۔ اس کی وجہ جرمن قومی ٹیم کی بیرون ملک مصروفیات ہیں۔ بنڈس لیگا میں پانچویں میچ ڈے کے میچ نو ستمبر کو شروع ہوں گے۔

 

رپورٹ:  ندیم گِل

ادارت:  عابد حسین