بحرین میں شیعہ مظاہروں کا پھر سے آغاز

نو ماہ قبل بحرین کی اکثریتی آبادی کی جانب سے سیاسی اصلاحات کی تحریک کو حکومت نے قریبی عرب ریاستوں کے فوجی تعاون سے سختی کے ساتھ کرش کردیا تھا اور اب سال کے اختتام پر ایک بار پھر شیعہ آبادی کے مظاہرے شروع ہوتے دکھائی دے رہے ہیں۔ اسی سال کی سابقہ تحریک کے دوران حراست میں لیے گئے افراد کے مقدموں کا سلسلہ ابھی بھی جاری ہے۔

گزشتہ کچھ دنوں سے شیعہ مظاہرین اُس مرکزی شاہراہ پر جمع ہو رہے ہیں جو بدایہ ہائی وے کہلاتی ہے اور یہ دارالحکومت مناما کے سابقہ پرل اسکوائر تک جاتی ہے۔ مارچ کی تحریک کو کرش کرنے کے بعد حکومت نے پرل اسکوائر کو مسمار کر کے اسے اب ایک انٹرچینج میں تبدیل کر کے اس کا نام الفاروق رکھ دیا ہے۔ مارچ کی تحریک کے دوران شیعہ مظاہرین نے اس چوک میں ڈیرے ڈال لیے تھے۔

بحرین کی شیعہ آبادی کی مرکزی جماعت الوفاق پارٹی اپنے سابقہ مؤقف کو دہراتی ہے کہ حکومت کو برخواست کرنے کے بعد سارے بحرین میں آبادی کی بنیاد پر حلقہ بندیاں کی جائیں اور اس کے بعد پارلیمانی الیکشن کا انعقاد کروایا جائے۔ دوسری جانب بحرین کی اقلیت سنی آبادی کے عمائدین کا خیال ہے کہ شیعہ آبادی بحرین کے امن کو ایک بار پھر خراب کرنے کے درپے ہے اور ان کا یہ عمل اس ریاست میں عدم استحکام کا سبب بنے گا۔

انسانی حقوق کے ایک بلاگر یوسف المحافضہ کا کہنا ہے کہ بدایہ ہائی وے پر قبضہ اس سلسلے کی ابتدا ہے جس کا انجام پرل اسکوائر پر قبضہ ہے۔ یوسف کے مطابق یہ شیعہ تحریک کا ایک بار پھر سے احیاء ہے۔ بحرینی حکام نے ایک خاتون شیعہ بلاگر زینب الخواجہ کو ضمانت پر ابھی گزشتہ روز منگل کو رہا کیا ہے۔ زینب الخواجہ کی ظالمانہ انداز میں حراست کی ویڈیو یوٹیوب پر دستیاب ہے۔

شیعہ مظاہرین کا یہ بھی کہنا ہے کہ اب ان کے پاس کھونے کے لیے کچھ بھی نہیں ہے کیونکہ بیشتر شیعہ افراد کو بحرینی حکام نے ملازمتوں سے فارغ کردیا ہے۔ شیعہ طالب علموں کو کالجوں اور یونیورسٹیوں سے نکال دیا گیا ہے۔ اس کے علاوہ کئی جیلوں میں ہیں اور بعض اپنی مدت سزا پوری کر کے رہا ہوئے ہیں۔ مارچ کی تحریک کے دوران تین ہزار کے قریب افراد کو گرفتار کیا گیا تھا۔ ان میں سات سو افراد ابھی بھی پسِ زندان ہیں۔

رواں برس مارچ کے بعد سے بحرین کے اندرون میں شیعہ دیہات اور قصبوں میں مظاہرے تواتر سے جاری رہے ہیں۔ بحرین کے امیر شاہ حمد نے مارچ کی تحریک کے حوالے سے ایک بین الاقوامی انکوائری کی رپورٹ کے تناظر میں بظاہر اصلاحات کا وعدہ ضرور کر رکھا ہے لیکن تاحال اس میں پیش رفت دکھائی نہیں دے رہی۔

رپورٹ: عابد حسین

ادارت: امتیاز احمد