بھارتی اداکار سلمان خان پچاس سال کے ہو کر بھی ہیرو

سلمان خان کی پچاس ویں سالگرہ کے موقع پر ممبئی کے ایک فارم ہاؤس میں ایک شاندار تقریب سجائی گئی، جس میں انیل کپور، کرشمہ کپور اور پریم چوپڑہ جیسی چوٹی کی فلمی شخصیات کے ساتھ ساتھ اس اداکار کے بہت سے پرستاروں اور مداحوں نے بھی شرکت کی۔ اس تقریب میں بالی وُڈ کے دو دیگر بڑے خان شاہ رخ خان اور عامر خان شریک نہیں ہوئے۔

گزشتہ رات ٹھیک بارہ بجے یہ تقریب برپا کی گئی، جس میں سلمان خان نے ’ہیپی برتھ ڈے‘ کے شور میں اپنی گولڈن جوبلی کا کیک کاٹا۔ بعد ازاں اس تقریب کی تصاویر سوشل میڈیا پر پوسٹ کی گئیں اور اس اداکار کو مبارک باد دی گئی۔

سلمان خان کو مبارک باد دینے والوں میں مایہ ناز بھارتی گلوکارہ لتا منگیشکر بھی شامل ہیں۔ چھیاسی سالہ لتا منگیشکر نے ٹوئٹر پر اپنے پیغام میں سلمان خان کو زندگی کے پچاس شاندار سال پورے کرنے پر تہنیت کا پیغام روانہ کیا ہے۔

اس پیغام کے ساتھ ساتھ لتا نے ایک گیت ’میرے رنگ میں رنگنے والی‘ کا لِنک بھی منسلک کیا ہے۔ گلوکار ایس پی بالاسبرامنیم نے یہ گیت سلمان خان کی بطور ہیرو ’میں نے پیار کیا’ کے لیے گایا تھا، جو 1989ء میں ریلیز ہوئی تھی۔ واضح رہے کہ نوّے کے عشرے میں ایس پی بالاسبرامنیم کی آواز کو سلمان خان کے لیے موزوں خیال کیا جاتا تھا۔

وہ اپنے طویل کیریئر میں اسّی سے زائد ہندی فلموں میں اداکاری کے جوہر دیکھا چکے ہیں۔'دبنگ‘ فلم کے ہیرو سلمان خان آج کل یش راج فلمز کی فلم ’سلطان‘ کی شوٹنگ میں مصروف ہیں اور عام زندگی میں بھی اُنہی مونچھوں کے ساتھ نظر آتے ہیں، جو اُن کے فلمی کردار کے لیے مخصوص ہیں۔

اب سے چند سال پہلے تک ایک ایسا وقت بھی تھا، جب سلمان خان کی تقریباً تمام فلمیں مسلسل ناکامی سے دوچار ہو رہی تھیں تاہم آج کل ان کی قسمت کا ستارہ عروج پر ہے۔ رواں سال اُن کی دو فلمیں ’بجرنگی بھائی جان‘ اور ’پریم رتن دھن پائیو‘ دونوں ہی باکس آفس پر ہِٹ رہیں۔

اس سال ممبئی کی ہائیکورٹ نے سلمان خان کو 2002ء کے ’ہِٹ اینڈ رَن‘ کے ایک مقدمے میں بری کر دیا۔ تیرہ برس قبل سن 2002 میں سلمان خان نے مبینہ طور پر ممبئی میں سڑک کے کنارے واقع ایک فٹ پاتھ پر سوئے ہوئے کچھ افراد پر گاڑی چڑھا دی تھی، جس کے نتیجے میں ایک شخص مارا گیا تھا۔ اس کیس کی ابتدائی تحقیقات سے ظاہر ہوا تھا کہ سلمان خان شراب پی کر گاڑی چلا رہے تھے۔

جہاں اس کیس کا فیصلہ سلمان خان کے لیے اطمینان کا باعث بنا، وہیں وہ اس سال ٹوئٹر پر اپنے کچھ متنازعہ پیغامات کی وجہ سے ہدفِ تنقید بھی بنے۔ اپنے اِن پیغامات میں اُنہوں نے 1993ء کے ممبئی بم دھماکوں میں سزا پانے والے یعقوب میمن کو بے گناہ قرار دیتے ہوئے لکھا تھا کہ اُسے اُس کے بھائی ٹائیگر کے گناہوں کی پاداش میں پھانسی پر نہیں لٹکایا جانا چاہیے۔ ان پیغامات پر احتجاجی مظاہرے شروع ہونے پر سلمان خان نے معافی مانگ لی تھی۔