بھارتی فوج کے ساتھ جھڑپ، پانچ مشتبہ باغی ہلاک

بھارتی فوج کے مطابق یہ جھڑپ اس وقت شروع ہوئی جب پاکستان کے زیرانتظام کشمیر سے مسلح جنگجوؤں نے دراندازی کی کوشش کی۔ متنازعہ علاقے کشمیر کو تقسیم کرنے والی لائن آف کنٹرول پر پاکستان اور بھارتی کی افواج کی بھاری نفری تعینات ہے، جب کہ دونوں فوجوں کے درمیان فائرنگ کا تبادلہ بھی معمول کی بات  ہے۔

بھارتی فوج کی جانب سے جمعے کو جاری کردہ بیان میں کہا گیا ہے کہ اُڑی کے قریب دراندازی کی کوشش کرنے والے عسکریت پسندوں اور فوج کے درمیان فائرنگ کا تبادلہ ہوا۔

اس سے ایک روز قبل مسلح باغیوں اور بھارتی فوج کے درمیان ایک جھڑپ میں ایک فوجی جب کہ تین عسکریت پسند ہلاک ہو گئے تھے۔ رواں ہفتے ہی دراندازی کی کوشش پر تین مشتبہ عسکریت پسندوں کو ہلاک کرنے کا دعویٰ بھی کیا گیا تھا۔

بھارت کی جانب سے پاکستان پر الزام عائد کیا جاتا ہے کہ وہ باغیوں کو اسلحہ فراہم کرتا ہے اور انہیں بھارت کے زیرانتظام کشمیر میں بھیجتا ہے، جب کہ پاکستان ایسے الزامات کو مسترد کرتا ہے۔

پاکستان کا موقف ہے کہ وہ کشمیری علیحدگی پسندوں کو حق خود ارادیت دلوانے کے لیے صرف اور صرف سفارتی مدد کر رہا ہے۔

یہ بات اہم ہے کہ کشمیر کا علاقہ سن 1947 میں تقسیم ہند کے بعد سے دونوں ممالک کے درمیان تنازعے کا باعث ہے، جب کہ دونوں ممالک کے درمیان یہ معاملہ جنگوں کا باعث بھی بن چکا ہے۔