بھارت: مسیحیوں کے خلاف تشدد

اس سے قبل دو ہزار دو میں گودھرا میں ٹرین آتش زنی معاملے کے متعلق بھی عدالتی کمیشنوں نے متضاد رپورٹیں دی تھیں۔‍

جنوبی بھارت میں بھارتیہ جنتا پارٹی کی قیادت میں 2008 میں پہلی مرتبہ حکومت کے قیام کے ساتھ ہی مسیحیوں کے خلاف پرتشدد حملوں کا سلسلہ شروع ہوگیا تھا۔ ریاست کے مختلف اضلاع میں گرجاگھروں اور مسیحیوں کو نشانہ بنایا گیا ۔ مسیحیوں کا الزام ہے کہ ان حملوں کے پیچھے شدت پسند ہندو تنظیموں آر ایس ایس، بجرنگ دل اور رام سینا کے لوگوں کا ہاتھ ہے جنہیں ریاست کی بی جے پی حکومت کی تائید و حمایت حاصل ہے۔

اپوزیشن پارٹیوں اور سول سوسائٹی کی تنظیموں کی طرف سے زبردست احتجاج اور مطالبات کے بعد بالآخر ریاست کی بی ایس یدیورپا حکومت نے ان معاملات کی انکوائری کے لئے جسٹس بی کے سوم شیکھر کمیٹی قائم کی جس نے گو کہ اپنی عبوری رپورٹ میں مسیحیوں پر حملوں کے لئے ہندو شدت پسند تنظیموں کی طرف انگلی اٹھائی لیکن 28ماہ کی طویل تفتیش کے بعد اپنی حتمی رپورٹ میں ریاستی حکومت کے ساتھ ساتھ آر ایس ایس، بجرنگ دل اور رام سینا کو بھی کلین چٹ دے دی۔

دوسری طرف ممبئی ہائی کورٹ اور کرناٹک ہائی کورٹ کے سابق جج جسٹس ایم ایف سلدھانا کی قیادت والی آزاد انکوائری کمیٹی نے مسیحیوں اور گرجاگھروں پر ہونے والے حملوں کے لئے نہ صرف شدت پسند ہندو تنظیموں بلکہ ریاستی پولیس اور حکومت کو بھی مورد الزام ٹھہرایا۔

جسٹس مائیکل سلدھانا نے فارینسک ثبوتوں اور میڈیا کی رپورٹوں کے علاوہ 400 مقامات کا دورہ کرنے اور تقریباً تین ہزار گواہوں کے بیانات کی بنیاد پر 308 صفحات پر مشتمل جو رپورٹ تیار کی اس میں وزیر اعلی اور اس وقت کے وزیر داخلہ کو مسیحیوں کے خلاف تشدد اور مظالم کے لئے مدد کرنے کا الزام لگایا ہے۔ انہوں نے کہا کہ مسیحیوں پر ہونے والے حملے پوری طرح منصوبہ بند تھے اور انہیں حکومت کی تائید و حمایت حاصل تھی۔ جسٹس سلدھانا نے اپنی رپورٹ میں کہا ہے کہ بجرنگ دل اور سری رام سینا کے لیڈروں نے سرعام اپنے جرائم کا اعتراف کیا ہے اور یہ بھی کہا ہے کہ مسیحیوں کو سبق سکھانے کے لئے اس طرح کے حملے کرنے کے لئے انہیں حکومت کی مدد حاصل رہی ہے۔

جسٹس مائیکل سلدھانا نے ڈوئچے ویلے سے بات کرتے ہوئے اس بات پر افسوس کا اظہار کیا کہ جسٹس سوم شیکھر نے عبوری رپورٹ میں تو بجرنگ دل اور رام سینا کے لوگوں کو حملوں کے لئے قصور وار گردانا لیکن بعد میں وزیر اعلی کے دباو میں آکر ان لوگوں کو کلین چٹ دے دی۔ جسٹس سلدھانا نے مزیدکہا کہ اپنی تفتیش کے دوران انہوں نے پایا کہ پولیس نے متاثرین کو سیکورٹی فراہم کرنے اور گرجا گھروں کو تشدد کا شکار ہونے سے بچانے کے بجائے حملہ آوروں کو بچانے کی کوشش کی۔ انہوں نے کہا کہ بھارتی آئین نے اقلیتوں کو جو حقوق دئے ہیں کرناٹک میں ان کی دھجیاں اڑا کر رکھ دی گئی ہے۔

اس دوران کرناٹک اسمبلی میں اپوزیشن کانگریس اور جنتا دل نے مسیحیوں پر ہونے والے حملوں کی مرکزی تفتیشی ایجنسی سی بی آئی سے انکوائری کرانے کا مطالبہ کیا ہے تاہم بی جے پی حکومت نے اس مطالبے کو یکسر مسترد کردیا۔ دریں اثناءکرناٹک کے ایک اور شہر بیلگام میں ایک کیتھولک اسکول کو نشانہ بنانے کی اطلاعات ہیں۔ ڈائیوسیز آف بیلگام کے فادر لوسیو میسکرنیہاس نے بتایا کہ بنگلور اور منگلور کے بعد اب شدت پسندوں نے بیلگام میں بھی مسیحیوں کو تشدد کا نشانہ بنانے کا سلسلہ شروع کردیا ہے۔

افتخار گیلانی، نئی دہلی

ادارت، شامل شمس