تائیوان: ’امن گھنٹی‘ کی تیاری

اس امن کی گھنٹی کی نقاب کشائی 23 اگست کو کی جائے گی۔ اس گھنٹی کی تیاری کا مقصد چین کے ساتھ پچاس برس پہلے ہونے والی جنگ کو مثبت انداز سے یاد کرنا ہے۔ خیال رہے کہ حالیہ چند برسوں کے دوران چین اور تائیوان کے درمیان تعلقات میں خاصی بہتری آئی ہے۔ یہ امن کی گھنٹی انہی بہتر تعلقات کی نمائندگی کرے گی۔

یہ گھنٹی دو میٹر اونچی ہے، جس کی نقاب کشائی اس ماہ کی 23 تاریخ کو کنمین جزیرے کے پیس میموریل پارک میں کی جائے گی۔ کنمین جزیرہ سن انیس سو پچاس کی دہائی سے انیس سو ستر کی دہائی تک چین اور تائیوان کے درمیان جنگی میدان تھا۔ اس گھنٹی کی خاص بات یہ ہے کہ یہ ان بموں کے خول سے حاصل کردہ دھات سے تیار کی جا رہی ہے، جو چین نے تائیوان پر گرائے تھے۔ 23 اگست انیس سو اٹھاون کو شروع ہونے والی جنگ کے دوران چالیس روز تک چین نے تائیوان پر کم از کم چار لاکھ اڑتالیس ہزار بم گرائے تھے۔ یہ بم کنمین جزیرے پر برسائے گئے تھے، جس کا دفاع تائیوان کے قوم پرست کر رہے تھے۔

چینی حکومت تائیوان پر اپنا حق جتاتی رہی ہے تاہم سن دو ہزار آٹھ میں صدر ما یِنگ جو کی چین دوست حکومت کے بر سر اقتدار آنے کے بعد سے دونوں ملکوں کے تعلقات میں ڈرامائی تبدیلی آئی ہے۔

تائیوان کی حکومت کی جانب سے اس امن گھنٹی کی تیاری تائیوان کے قوم پرستوں کی تحریک کے سو برس پورے ہونے کے حوالے سے منعقد کی جانے والی تقریبات کا حصہ ہے۔

رپورٹ: شامل شمس⁄ خبر رساں ادارے

ادارت: امجد علی