ترک فوج کا کرد باغیوں کے خلاف آپریشن، سو سے زائد ہلاکتیں

دیاربکر سے اتوار بیس دسمبر کو ملنے والی نیوز ایجنسی اے ایف پی کی رپورٹوں میں بتایا گیا ہے کہ بدھ سولہ دسمبر کو کردستان ورکرز پارٹی PKK کے جنگجوؤں کے خلاف شروع کیا جانے والا ملکی فوج کا یہ آپریشن اپنے پانچویں دن میں داخل ہو گیا ہے اور ابھی تک جاری ہے۔

ایک ترک سکیورٹی اہلکار نے آج اے ایف پی کو بتایا کہ اس عسکری آپریشن میں اب تک ہلاک ہونے والے کرد باغیوں کی تعداد اب 102 ہو گئی ہے۔ کل ہفتہ انیس دسمبر تک یہ تعداد سرکاری طور پر 70 بتائی گئی تھی۔

سکیورٹی ذرائع کے مطابق سرکاری دستوں کی باغیوں کے ساتھ ہونے والی خونریز جھڑپوں میں اب تک دو فوجی اور کم از کم پانچ عام شہری بھی مارے جا چکے ہیں۔

کل ہفتے کے روز اپنے ایک بیان میں ترک فوج نے جن کم از کم 70 باغیوں کی ہلاکت کا دعویٰ کیا تھا، وہ سب کے سب کرد عسکریت پسندوں کی ممنوعہ پارٹی پی کے کے سے تعلق رکھنے والے جنگجو بتائے گئے تھے۔

مقامی میڈیا کے مطابق اس فوجی کارروائی کے لیے دس ہزار سرکاری فوجیوں کو ملک کے جنوب مشرق میں تعینات کیا گیا ہے، جنہیں ٹینکوں کی مدد بھی حاصل ہے۔ اس آپریشن کا مقصد کردستان ورکرز پارٹی کے حامی مسلح نوجوانوں کو وہاں کے شہری علاقوں سے نکالنا ہے۔

ملکی فوج کے ایک بیان کے مطابق اس عسکری مہم میں زیادہ تر صوبے سِرناک کے شہروں جیزرے اور سیلوپی اور دیاربکر کے چند علاقوں کو نشانہ بنایا جا رہا ہے۔ دیاربکر اس خطے کا سب سے زیادہ آبادی والا شہر ہے۔

قبل ازیں ترک فوج نے جمعے کے روز اپنے ایک بیان میں یہ بھی کہا تھا کہ اس نے ترکی کے ساتھ سرحد کے پار شمالی عراق میں بھی مسلح کارروائیاں کی تھیں، جہاں کردوں کی اس کالعدم تنظیم کے جنگجوؤں نے اپنے اڈے قائم کر رکھے تھے۔

اس دوران عراقی سرزمین پر کرد باغیوں کی پناہ گاہوں کو فضائی حملوں کا نشانہ بھی بنایا گیا تھا اور عسکریت پسندوں کے کئی ٹھکانے اور ہتھیاروں کی ذخیرہ گاہیں‘ بھی تباہ کر دی گئی تھیں۔