جرمن اسرئیل حکومتی اجلاس منسوخ

جرمن حکومت کے ایک ترجمان نے بتایا کہ دونوں ممالک کی حکومتوں نے اس اجلاس کو ملتوی کرنے پر اتفاق کیا ہے۔ ان کے بقول اب وزراء اور رہنماؤں کا یہ اجلاس اگلے برس ہو گا۔ ترجمان کے بیان کے مطابق ترقی یافتہ ممالک کی تنظیم جی ٹوئنٹی کی سربراہی کی وجہ سے جرمن حکومت پر مصروفیات کا بوجھ بہت زیادہ ہے۔ دوسری جانب اسرائیلی وزارت خارجہ کے ایک ترجمان نے بھی جرمنی کی بے حد مصروفیات کی وجہ سے اجلاس کے التواء کی تصدیق کر دی ہے۔

درین اثناء ایک جرمن اہلکار نے نام خفیہ رکھنے کی شرط پر خبر رساں ادارے روئٹرز کو بتایا کہ ان کے خیال میں اس اجلاس کی ملتوی کرنے کی اصل وجہ مشرق وُسطی امن عمل کے حوالے سے دونوں حکومتوں کے مؤقف میں پایا جانے والا وسیع فاصلہ ہے۔ ایک سینیئر جرمن  اہلکار کے مطابق، ’’ہمارے باہمی روابط میں کمی آئی ہے۔ ہم نے موجودہ حالات میں تعلقات میں کسی پیش رفت کی امید ایک طرح سے ختم کی ہوئی ہے۔‘‘

جرمن اور اسرائیل کے مابین حکومتی سطح کا یہ اجلاس رواں برس مئی میں ہونا تھا۔