1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

حقانی کا استعفیٰ پاکستان کا اندرونی معاملہ ہے، امریکہ

23 نومبر 2011

وائٹ ہاؤس کی طرف سے جاری کیے گئے ایک بیان میں کہا گیا ہے کہ واشنگٹن میں تعینات پاکستانی سفیر حسین حقانی کا استعفیٰ پاکستان کا اندرونی معاملہ ہے۔ تاہم اس بیان میں حسین حقانی کی خدمات کی ستائش کی گئی ہے۔

https://p.dw.com/p/13FAV
ڈیموکریٹ سینیٹر جان کیریتصویر: AP

قومی سلامتی کے نائب مشیر برائے اسٹریٹیجک کمیونیکیشن بن روڈز نے حسین حقانی کے مستعفی ہونے کے معاملے پر تبصرہ کرتے ہوئے کہا، ’جیسا کہ ہم نے کہا ہے کہ ہم اس پیشرفت کو پاکستان کا اندرونی معاملہ سمجھتے ہیں‘۔ انہوں نے مزید کہا کہ حسین حقانی واشنگٹن حکومت کے ایک اہم ساتھی تھے، ’ہم بطور سفارتکار حسین حقانی کی خدمات کی تعریف کرتے ہیں۔ لیکن اس کے ساتھ ہی ہمیں اس بات کا یقین بھی ہے کہ حسین حقانی کے بعد پاکستان کی طرف سے واشنگٹن میں جو بھی سفیر مقرر کیا جائے گا، ہم اس کے ساتھ بھی انتہائی اچھے طریقے سے کام کرنے کے قابل ہوں گے‘۔

حکومت پاکستان نے کہا ہے کہ حسین حقانی کا استعفیٰ منظور کر لیا گیا ہے اور اس معاملے کی مکمل تحقیقات کا حکم دے دیا گیا ہے۔ حسین حقانی پر الزام ہے کہ انہوں نے اپنے اختیارات سے تجاوز کرتے ہوئے رواں برس مئی میں ایک ایسا مراسلہ اس وقت کے امریکی افواج کے سربراہ ایڈمرل مائیک مؤلن تک پہنچایا تھا، جس میں پاکستانی صدر آصف علی زرداری کی حکومت کے خلاف ممکنہ فوجی انقلاب سے بچنے کے لیے امریکی مدد طلب کی گئی تھی۔ حسین حقانی ان تمام الزامات کو مسترد کرتے ہیں اور ان کا کہنا ہے کہ وہ اپنی بے گناہی ثابت کرنے کے لیے تحقیقات کا سامنا کرنے کو تیار ہیں۔

Pakistan USA Botschafter Husain Haqqani
حسین حقانی نے کہا ہے کہ وہ اپنی بے گناہی ثابت کریں گےتصویر: AP

صدر پاکستان کے ایک اہم ساتھی تصور کیے جانے والے حسین حقانی نے پاکستان اور امریکہ کے مابین حالیہ کشیدگی کو کم کرنے میں اہم کردار ادا کیا تھا۔

امریکی سینیٹ کی خارجہ امور کی کمیٹی کے چیئرمین جان کیری نے حسین حقانی کے مستعفی ہونے کی خبروں پر تبصرہ کرتے ہوئے اظہار افسوس کیا ہے۔ انہوں نے کہا، ’وہ پاکستان اور پاکستانی عوام کے ایک اہم اور مضبوط وکیل تھے۔ میں پاکستانی حکومت کے اس فیصلے کا احترام کرتا ہوں لیکن یہاں واشنگٹن میں ہم حقانی کی فہم و فراست اور تجربے کی کمی محسوس کریں گے‘۔ ڈیموکریٹ سینیٹر جان کیری نے مزید کہا کہ پاکستان اور امریکہ باہمی تعقات میں اتارچڑھاؤ کے باوجود کام کرتے رہے ہیں اور دونوں ملکوں کے درمیان مستقبل میں بھی تعاون جاری رہے گا۔

رپورٹ: عاطف بلوچ

ادارت: حماد کیانی

اس موضوع سے متعلق مزید سیکشن پر جائیں

اس موضوع سے متعلق مزید

مزید آرٹیکل دیکھائیں