ساتواں ورلڈ یوگا ڈے2021

یوگا کے عالمی دن کے موقع پر21جون کو دنیا بھر میں یوگا کی تقریبات منعقد کی گئیں۔ یہ تصویر امریکا کے ٹائمز اسکوائر کی ہے۔ جہاں بڑی تعداد میں لوگوں نے یوگا کی مشقیں کیں۔

بھارتی وزیر اعظم نریندر موودی نے یوگا کو کورونا وائرس کے خلاف تحفظاتی ڈھال قرار دیا۔ ان کا کہنا تھا کہ ڈاکٹروں اور مریضوں، دونوں نے اس سے استفادہ کیا۔ یہ علاج کے ساتھ صحت مندی پر زور دیتا ہے۔

اس سال کے یوگا کا موضوع تھا، ’تندرستی کے لیے یوگا‘۔ وزیر اعظم مودی کا کہنا تھا کہ کووڈ وبا کے دوران یوگا نے لوگوں میں امید کی ایک نئی کرن پیدا کی ہے۔

یوگا بھارت کی قدیم ترین زبان سنسکرت کا لفظ ہے۔ جس کا مطلب ہے ملن یا اتصال۔ یوگا کو جسم اور روح کے اتصال کی علامت قرار دیا جاتا ہے۔

جدید ماہرین یوگا کو جسمانی طورپر چاق و چوبند رہنے کے لیے ایک بہتر ورزش قرار دیتے ہیں۔ اس کی ابتدا دوسری سے پانچویں صدی قبل مسیح کے درمیان بتائی جاتی ہے۔

آگرہ کے تاج محل کی طرح یوگا بھی آج دنیا بھر میں بھارت کی پہچان بن چکا ہے۔ بھارت نے اس کے فروغ کے لیے ایک خصوصی وزارت بھی قائم کی ہے۔

ایک حلقہ یوگا کو ہندو مت کے احیاء کی کوشش قرار دیتا ہے۔ اس کی بیشتر مشقیں اور بالخصوص سب سے پہلے کی جانے والی ’سوریہ آسن‘ (سورج کی طرف منہ کرکے مشق) کو ہندوؤں کی مذہبی رسوم سے جوڑ کر دیکھا جاتا ہے۔

بھارت میں متعدد مسلم تنظیموں کا کہنا ہے کہ یوگا دراصل تمام غیر ہندووں پر حکمراں ہندو قوم پرست جماعت بی جے پی کی ہندو رسوم و رواج نافذ کرنے کی چال ہے۔

یوگا کے قدامت پسند ماہرین اسے جدیدیت کے رنگ میں رنگنے کے خلاف ہیں۔ ان کا کہنا ہے کہ جدیدیت نے یوگا کے آفاقی رنگ کو میلا کردیا ہے اور مادہ پرستی کے راستے سے روحانیت کی منزل طے نہیں کی جا سکتی۔

یوگا کو عالمی سطح پر مقبول بنانے کا سہرا بڑی حد تک وزیر اعظم نریندر مودی کے سر جاتا ہے۔ ان کی کوششوں سے سن 2014 میں اقوام متحدہ نے 21 جون کو یوگا کا عالمی دن قرار دیا تھا۔ پہلا یوگا ڈے 21 جون 2015 کو منایا گیا تھا۔

بھارتی حکومت نے اس برس یوگا ڈے کے موقع پر ایک ایپ لانچ کیا ہے۔ عالمی ادارہ صحت کے تعاون سے تیار کردہ اس ایپ کی مدد سے یوگا کی مشقیں اور دیگر معلومات مختلف زبانوں میں حاصل کی جاسکتی ہیں۔ جاوید اختر