’سلیکشن ٹھیک ہوتی تو پہلے میچ بھی نہیں ہارتے‘

صدرپاکستان آصف علی زرداری اور وزیر اعظم یوسف رضا گیلانی نے ٹیم کے کپتان سلمان بٹ کے نام تحسین اور مبارکباد کے پیغامات بھیجتے ہوئے ان کی کارکردگی کوسراہا۔ صدر زرداری نے کہا ہے کہ موجودہ حالات میں اس جیت پر پوری ٹیم مبارکباد کی مستحق ہے۔

سابق ٹیسٹ کرکٹر عامر سہیل کا کہنا ہے کہ اگر پی سی بی کے سلیکٹرز شروع سے ہی بہتر منصوبہ بندی کرتے تو پاکستان کو سیریز میں صفر کے مقابلے میں تین سے برتری حاصل ہوتی۔ سہیل نے ٹیم میں فوری طور پر یونس خان اور توفیق عمر کی واپسی کا مطالبہ بھی دہرایا۔

سلیکشن کمیٹی کے سابق سربراہ اقبال قاسم نے بھی یونس کی واپسی کا مطالبہ کیا ہے۔ قاسم کے مطابق یونس کی واپسی سے ٹیم مزید مضبوط ہوگی اگرچہ موجودہ نوجوان ٹیم نے اچھی کارکردگی کا مظاہرہ کیا ہے تاہم پہلے دو میچوں میں شکست کی وجہ تجربے کی کمی ہی تھی۔

دوسری جانب ہر طرف سے تنقید کے شکار، کرکٹ بورڈ کے چیئر مین اعجاز بٹ نے بھی ٹیم کی جیت پر ایک پیغام جاری کیا ہے۔ اس میں کہا گیا ہے کہ ٹیم نے بہترین پیشہ ورانہ کھیل کا مظاہرہ کرکے جیت یقینی بنائی۔ بٹ نے تجربہ کار بلے باز محمد یوسف کو بھی سراہا جنہوں نے اوول ٹیسٹ کی پہلی اننگز میں 56 اور دوسری اننگز میں 33 رنز بنائے۔

محمد یوسف کے تجربے کے ساتھ ساتھ نوجوانوں کی کارکردگی نے بھی اس جیت میں اہم کردار ادا کیا ہے۔ کپتان سلمان بٹ نے محمد عامر اور وہاب ریاض کی گیند بازی کو سراہتے ہوئے کہا کہ یہ دونوں مستقبل کے بڑے کھلاڑی بننے کی صلاحیت رکھتے ہیں۔ ’’ ہر ایک نے اپنا کردار اچھے طریقے سے نبھایا، کامران اکمل نے تمام کیچ پکڑے، محمد آصف، محمد عامر اور پہلا میچ کھیلنے والے وہاب ریاض نےبھی وکٹیں لیں اور اظہر علی نے نمایاں 92 رنز بنائے‘‘۔

پاکستان اور انگلینڈ کے درمیان سیریز کا حتمی چوتھا ٹیسٹ 26 اگست کو لارڈز کے میدان پر کھیلا جائے گا۔

رپورٹ شادی خان سیف

ادارت عصمت جبیں