ضرورت مند ملکوں کی بہتر مدد، جنوبی کوریا میں عالمی ڈونر کانفرنس

جنوبی کوریا کے شہر بوسان میں اس موضوع پر ہونے والی عالمی کانفرنس میں 160 ملکوں کے ساڑھے تین ہزار کے قریب ماہرین حصہ لے رہے ہیں۔ اس عالمی کانفرنس کا مقصد ضرورت مند ملکوں کو مالی امداد کی فراہمی کے عمل کو بہتر اور زیادہ مؤثر بنانا ہے، خاص کر ایسے وقت میں، جب روایتی ڈونر ملکوں کو اپنے بجٹوں میں مالی مشکلات کا سامنا ہے۔

اس کے علاوہ وہ ڈونر، جو غریب ملکوں کو مالی امداد دینے والی ریاستوں کی فہرست میں نئے شامل ہوئے ہیں، انہیں اپنے ہاں سرکاری اخراجات میں مجبوراﹰ کمی کا سامنا بھی ہے۔ ایسے ملکوں میں چین، بھارت اور برازیل سب سے نمایاں ہیں۔

اس کانفرنس سے خطاب کرتے ہوئے اقوام متحدہ کے سیکر‌‌ٹری جنرل بان کی مون نے کہا کہ یورپ اور امریکہ کو اپنے اقتصادی حالات کی وجہ سے جدوجہد کرنا پڑ رہی ہے لیکن مشرقی اور جنوبی ایشیا، لاطینی امریکہ حتیٰ کہ افریقہ میں بھی کئی ابھرتی ہوئی اقتصادی طاقتیں سامنے آ رہی ہیں۔

بان کی مون نے کہا کہ ایسے ملکوں پر ترقی اور کامیابی کے ساتھ نئی ذمہ داریاں بھی عائد ہوتی ہیں۔ اقوام متحدہ کے سیکرٹری جنرل کے مطابق دنیا کی ضرورت مند اور غریب ریاستوں کی مالی مدد کے لیے مختلف بر اعظموں میں ایسی نئی اقتصادی طاقتوں کو آگے آنا چاہیے تاکہ وہ اپنے نئے قائدانہ فرائض سنبھال سکیں۔

اس کانفرنس کے شرکاء کے درمیان مشوروں کا سب سے اہم موضوع یہ ہے کہ غریب ریاستوں کے لیے ترقیاتی مالی امداد کی فراہمی کو بہتر کیسے بنایا جا سکتا ہے۔ کانفرنس سے خطاب کرتے ہوئے امریکی وزیر خارجہ ہیلری کلنٹن نے کہا کہ غریب ملکوں کو جو امداد دی جاتی ہے، انہیں اس امداد کو استعمال کرنے کے طریقے بھی بہتر بنانا ہوں گے۔ اس کے لیے امریکی وزیر خارجہ نے ’عقل مند خریدار‘ کی اصطلاح استعمال کرتے ہوئے کہا کہ ترقیاتی امداد وصول کرنے والے ملکوں کو دانشمندی کے ساتھ یہ فیصلے کرنا ہوں گے کہ وہ ایسی رقوم کو کہاں استعمال کرتے ہیں۔

اس موقع پر ہلیری کلنٹن نے تمام ڈونر ملکوں سے یہ اپیل بھی کی کہ وہ مل کر اس بات کو یقینی بنائیں کہ مالی مدد وصول کرنے والے ملک زیادہ سے زیادہ حد تک اپنی مدد آپ کرنے کے قابل ہو سکیں۔ کلنٹن نے کہا کہ یہ صورت حال افسوسناک ہے کہ کئی ملک اپنے ہاں سے تیل، ہیرے اور دیگر قیمتی اشیاء برآمد تو کرتے ہیں لیکن خود پھر بھی غریب ہی رہتے ہیں۔

رپورٹ: عصمت جبیں

ادارت: امجد علی