عراقی شہر کرکوک میں دھماکہ، 72 افراد ہلاک
21 جون 2009پولیس حکام کے مطابق یہ حملہ اس وقت ہوا جب لوگ ایک مسجد سے نماز ظہر کے بعد باہر آرہے تھے۔ حکام اور عینی شاہدین کے مطابق اس حملے میں مسجد کے علاوہ اردگرد کے کئی مکانوں کو بھی نقصان پہنچا ہے۔
ٹرک بم حملے کے بعد بچاوٴ اور راحت کاری کی ٹیمیں ملبے تلے دبے لوگوں کو نکالنے کے کام میں مصروف ہیں۔ امریکی فوج کا کہنا ہے کہ اس نے جائے وقوعہ پر جنریٹر کے ذریعے بجلی اور اس کے علاوہ پانی کا انتظام بھی کیا ہوا ہے تاکہ بچاوٴ کارروائی میں مدد مل سکے۔
ذرائع نے ہلاک شدگان کی تعداد میں اضافے کا خدشہ ظاہر کیا ہے۔ ہسپتال اور پولیس ذرائع نے اپنا نام ظاہر نہ کرنے کی شرط پر بین الاقوامی خبر رساں اداروں کو بتایا کہ ملبے سے مزید لاشیں مل رہی ہیں۔ حکام نے پولیس کو دھماکے کے بارے میں اطلاعات فراہم کرنے سے منع کررکھا ہے۔
عینی شاہدین نے بتایا کہ دھماکے کے نتیجے میں ملبے کے نیچے دبنے سے بھی کئی ہلاکتیں ہوئی ہیں۔