غزہ کی تازہ ترین صورتحال

بین الاقوامی ذرائع ابلاغ کے مطابق اسرائیلی فوج کی جانب سے غزہ کے گنجان آباد علاقے پر تازہ اسرائیلی کارروائیوں میں کم از کم 15 فلسطینی ہلاک ہو چکے ہیں۔ ذرائع کا کہنا ہے کہ اسرائیلی فوج کو ان کارروائیوں میں ٹینکوں اور بھاری توپ خانے کی مدد حاصل ہے۔

حماس کے زیر انتظام غزہ پٹی کے محکمہ صحت کے مطابق اب تک ہلاک ہونے والے فلسطینیوں کی مجموعی تعداد 1055 ہو چکی ہے۔ فلسطینیوں کے حقوق کے ایک گروپ کے مطابق مرنے والوں میں 670 افراد عام شہری تھی۔ دوسری جانب حماس کے راکٹ حملوں میں 13 اسرائیلی مارے جا چکے ہیں جن میں دس فوجی اور تین شہری ہیں۔

مبصرین کا کہنا ہے کہ جنگ بندی کے کسی معاہدے سے قبل اسرائیل اس کارروائی میں زیادہ سے زیادہ حد تک کامیابی چاہتا ہے۔ اسرائیلی وزیر دفاع ایہود باراک کا کہنا ہے کہ اسرائیلی فوج آخری لمحے تک لڑائی جاری رکھے گی۔