فیفا ورلڈ کپ : آج جرمنی اور انگلینڈ مد مقابل

آج بلوم فونٹین میں کھیلے جانے والے اس میچ سے قبل جرمنی اور انگلینڈ کی ٹیمیں کُل ستائیس مرتبہ بین الاقوامی میچ کھیل چکی ہیں۔ ان میں سے جرمنی نے دس مرتبہ جبکہ انگلینڈ نے بارہ مرتبہ کامیابی حاصل کی،باقی ماندہ میچ بغیر کسی نتیجے کے ختم ہوئے۔

عالمی کپ مقابلوں میں دونوں ٹیموں نے ایک ایک بار کامیابی حاصل کی جبکہ تین میچ برابر ہوئے۔ انگلینڈ نے سن 1966ء کے عالمی کپ میں جرمنی کو شکست دی تھی اور عالمی چیمپیئن بننے کا اعزاز بھی حاصل کیا تھا۔ جرمنی نے سن 1970ء کے ورلڈ کپ میں انگلینڈ کو ہرایا تھا۔

جرمنی نے اب تک کل تین مرتبہ عالمی چیمپئین بننے کا اعزاز حاصل کر رکھا ہے جبکہ چار مرتبہ دوسرے نمبر پر آنے کا۔ آخری مرتبہ جرمنی نے سن 1990ء میں یہ اعزاز حاصل کیا تھا۔ اس سے قبل سن 1954ءاورسن 1974ء میں بھی جرمنی نے چیمپیئن کا تاج سر پر سجایا تھا۔

اس مرتبہ جرمن اسکواڈ میں لوکاس پوڈولسکی اور میروسلاو کلوزے ایسے کھلاڑی ہیں جنہوں نے عالمی کپ مقابلوں کے ناک آؤٹ راوانڈ میں گول کر رکھے ہیں۔ ان دونوں کھلاڑیوں سے جرمن کوچ یواخم لوو کوبہت سے امیدیں وابستہ ہیں۔ کلوزے نے اگر آج کے میچ میں گول کیا تو انفرادی طور پر وہ پچاس بین الاقوامی گول کرنے والے کھلاڑی بن جائیں گے۔ دوسری طرف انگلینڈ کی ٹیم نے ابھی تک اس ٹورنامنٹ میں کوئی خاص کارکردگی نہیں دکھائی۔ ان کے اسٹار کھلاڑی رونی گزشتہ سات میچوں سے کوئی بھی گول اسکور نہیں کر سکے ہیں۔

اس میچ میں یوروگوائے کے خوخے لورآنڈا ریفری کے طور پر اپنی خدمات سر انجام دے رہے ہیں۔ یہ میچ عالمی وقت کے مطابق دن دو بجے شروع ہو گا۔

آج کے دن ایک اور اہم پری کوارٹر فائنل میں ارجنٹائن اور میکسیکو کی ٹیمیں مد مقابل ہیں۔ آج کے دن کےدونوں میچوں میں کامیابی حاصل کرنے والی ٹیمیں کوارٹر فائنل میں مد مقابل ہوں گی۔

رپورٹ : عاطف بلوچ

ادارت : عاطف توقیر