1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

لیبیا مشن میں حملہ آور ہیلی کاپٹر بھی استعمال ہوں گے، فرانس

24 مئی 2011

فرانسیسی حکومت نے کہا ہے کہ معمر القذافی کی افواج کے خلاف مؤثر کارروائی کے لیے وہ برطانیہ کے ساتھ مل کر حملہ آور ہیلی کاپٹروں کا استعمال بھی کرے گی۔

https://p.dw.com/p/11MUO
تصویر: AP

لیبیا میں قذافی کی افواج کے خلاف نیٹو کے آپریشن کو دو ماہ سے زائدکا عرصہ ہو چکا ہے لیکن ابھی تک کوئی خاطر خواہ نتائج برآمد نہیں ہوئے ہیں۔

فرانسیسی وزیر خارجہ الاں ژوپے نے کہا ہے کہ ان ہیلی کاپٹروں کی مدد سے نیٹو افواج کے حملوں میں بہتری آئےگی اور شہری ہلاکتوں سے بچا جا سکےگا۔ برسلز منعقدہ یورپی یونین کے خارجہ اور دفاعی امور کے وزراء کی ایک ملاقات کے موقع پر فرانسیسی وزیر خارجہ نے کہا کہ پیرس حکومت لیبیا آپریشن کے لیے Tigre اور Gazelle نامی ہیلی کاپٹرز استعمال کرے گی ۔ انہوں نے کہا کہ نیٹو افواج آئندہ کچھ ہفتوں کے دوران اپنی عسکری کارروائی میں تیزی لائیں گی تاہم اس کے ساتھ ساتھ لیبیا کے بحران کے حل کے لیے سیاسی کوششیں بھی جاری رکھی جائیں گی۔

EU Außenministertreffen in Luxemburg Alain Juppe
فرانسیسی وزیر خارجہ الاں ژوپےتصویر: dapd

لیبیا میں باغیوں نے اگرچہ مشرقی علاقوں پر اپنا کنٹرول قائم کر لیا ہے تاہم طرابلس میں اب بھی قذافی کی افواج مزاحمت دکھا رہی ہیں۔ فرانس اور برطانیہ نے امریکہ کے ساتھ مل کر پہلی مرتبہ 19 مارچ کو قذافی کے فوجی اہداف کو نشانہ بنانا شروع کیا تھا۔ تب سے ہی فرانس اور برطانیہ عالمی برداری پر زور دے رہے ہیں کہ قذافی کی افواج کو پسپا کرنے کے لیے مزید عسکری تعاون کی ضرورت ہے۔

دوسری طرف طرابلس حکومت نے کہا ہے کہ نیٹو کے تازہ فضائی حملوں کے نتیجے میں کم ازکم تین افراد ہلاک جبکہ 150 زخمی ہو گئے ہیں۔

طرابلس حکومت کے ترجمان موسیٰ ابراہیم نے بتایا ہے کہ منگل کو علی الصبح مغربی دفاعی اتحاد نیٹو کی طیاروں نے لیبیا میں شدید بمباری کی،’ ہماری معلومات کے مطابق ان تازہ حملوں کے نتیجے میں تین افراد ہلاک ہوئے جبکہ 150 زخمی ہو گئے‘۔ انہوں نے بتایا کہ ان حملوں میں فوج کو مدد فراہم کرنے والے رضاکاروں کی بیرکوں کو نشانہ بنایا گیا،’ حملے کے وقت بیرکیں خالی تھیں۔ اس لیے ان حملوں سے متاثر ہونے والوں میں زیادہ تر شہری ہیں، جو آس پاس رہتے ہیں‘۔

خبر رساں ادارے اے ایف پی کے مطابق نیٹو کے طیاروں نے نصف گھنٹے تک یہ کارروائی جاری رکھی۔ بتایا گیا ہے کہ اس نئے حملے میں معمر القذافی کے کمپاؤنڈ باب العزیزیہ کے نواح میں بھی زور دار دھماکوں کی آوازیں سنی گئیں۔

رپورٹ: عاطف بلوچ

ادارت: مقبول ملک

اس موضوع سے متعلق مزید سیکشن پر جائیں

اس موضوع سے متعلق مزید

مزید آرٹیکل دیکھائیں