لیبیا کوسٹ گارڈ نےجرمن فلاحی ادارے کی کشتی پکڑ لی

لیبیا کی کوسٹ گارڈ کے ایک ترجمان نے خبر رساں ادارے ڈی پی اے کو بتایا ہے کہ جرمن امدادی کشتی میں موجود افراد کو اس لیے حراست میں لیا گیا ہے کیونکہ ان کی کشتی تیونس سے لیبیا کی بحری سرحد میں بغیر اجازت داخل ہوئی۔ یہ امدادی کشتی امدادی ادارے ’سی آئی ‘ کی ملکیت ہے اور بحیرہ ء روم کے راستے یورپ جانے والے تارکین وطن کو ڈوبنے سے بچانے کے مشن پر مامور ہے۔ فلاحی ادارے ’سی آئی ‘ کا اس حوالے سے کہنا ہے کہ ان کی یہ نئی تیز رفتارکشتی تیونس کے شہر زارزس سے لیبیا کے متعلقہ ساحلی علاقے میں فوری مدد کے لیے کارروائیاں کرتی ہے۔ مزید یہ کہ سپیڈ بوٹ امدادی مشن پر مامور اپنے بڑے جہاز سے علیحدہ ہو کر سفر کر رہی تھی۔ ’سی آئی‘ کے مطابق وہ جہاز جس کے ماتحت یہ امدادی کشتی ہے، مالٹا سے لیبیا کے ساحلوں کی سمت رواں دواں ہے۔ غیر سرکاری فلاحی ادارے سی آئی کا کہنا ہے کہ گزشتہ چار ماہ میں اس نے مختلف امدادی کارروائیوں میں لگ بھگ چار ہزار افراد کو بچایا ہے۔ اٹلی کی وزارت داخلہ کے مطابق رواں برس اب تک قریب بارہ لاکھ پچاس ہزار تارکین وطن نے سمندری راستے کے ذریعے لیبیا سے یورپ پہنچنے کی کوشش کی ہے۔ ان میں سے زیادہ تر افراد کا تعلق افریقی ممالک سے ہے جنہوں نے لیبیا کے ساحلوں کو استعمال کر کے شکستہ کشتیوں کے ذریعے یورپ پہنچنے کی کوشش کی۔