’مردے چور‘ گرفتار

پاکستانی میڈیا کی رپورٹوں کے مطابق ان دونوں افراد کو کراچی کے قبرستان میں منگل کی شب ایک چھاپے کے دوران گرفتار کیا گیا۔ انہیں گلشنِ معمار کے قبرستان سے حراست میں لیا گیا۔

کراچی پولیس کے مطابق گڈاپ ٹاؤن کے قبرستان میں چالیس سے زائد قبروں کے کھودے جانے اور وہاں سے مردوں کی ہڈیاں یا جسم کے دوسرے حصے غائب ہونے کی شکایات پر اہل علاقہ کی طرف سے شدید احتجاج سامنے آیا تھا۔ ان شکایات کے بعد مختلف قبرستانوں میں سادہ کپڑوں میں پولیس اہلکار تعینات کر دیے گئے تھے۔

ایک پاکستانی ٹیلی وژن چینل دنیا نیوز نے گرفتار کیے جانے والے افراد کے حوالے سے بتایا ہے کہ وہ قبروں سے چوری شدہ انسانی ہڈیاں کالا جادو کرنے والوں کو فروخت کرتے تھے، جو بھاری رقوم کے عوض لوگوں کے لیے جادو ٹونہ کرتے ہیں۔

پاکستان میں جادو ٹونہ کرنے والے ’بابے‘ بکثرت موجود ہیں اور کمزور اعتقاد کے لوگ اپنے کام کرانے کے لیے ایسے جعلسازوں کو بڑی بڑی رقوم دے کر اپنے مقاصد حاصل کرنے کی کوشش کرتے ہیں۔ یہ نام نہاد ’روحانی بابے‘ تعویز گنڈے اور کالے جادو کے ذریعے مختلف امراض کے علاج کے دعوے بھی کرتے ہیں جن میں بے اولادی، کینسر، دل کے امراض سمیت ہر طرح کی بیماریاں شامل ہوتی ہیں۔ ایسے لوگ قسمت کی خرابی دور کرنے، امتحان میں کامیابی، پرائز بانڈ کے نمبر بتانے اور محبوب کا دل جیتنے میں کامیابی کے بھی دعویدار ہوتے ہیں۔

رپورٹ: افسر اعوان / خبر رساں ادارے

ادارت: مقبول ملک