مشاعیل بالاک نے الوداعی میچ کی پیش کش ٹھکرا دی

جرمن ٹیم کے کوچ لوو نے ایک بیان میں واضح کر دیا ہے کہ قومی دستے میں اب بالاک کی جگہ نہیں رہی ہے۔ جرمن ٹیم کے کوچ نے کہا تھا کہ نوجوانوں نے اب جگہ سنبھال لی ہے تاہم پھر بھی بالاک کو دعوت دی جاتی ہے کہ وہ برازیل کے خلاف کھیلے جانے والے میچ میں اعزازی طور پر شرکت کرسکتے ہیں۔

جرمن ٹیم کے قومی کوچ لوو کے بقول، ’’ میرا اندازہ ہے کہ بالاک ہمارے نکتہء نظر سے واقف ہیں، سب کے مفاد میں ایک واضح اور ایماندارانہ فیصلے کو سراہا جائے گا۔‘‘ دوسری جانب بالاک نے لوو کے اس بیان پر قدرے غصیلے انداز میں اپنا ردعمل ظاہر کیا ہے۔ جرمن ٹیم کے سابق کپتان کے بقول، ’’ اگر ایسا تاثر پیدا کیا جا رہا ہے کہ ذاتی طور پر میرا یا بطور جرمن ٹیم کے کپتان کے میرے کردار کا ایمانداری سے لحاظ رکھا گیا ہے تو یہ منافقت ہے۔‘‘

بالاک نے پہلے سے طے شدہ ایک دوستانہ میچ کو الوداعی میچ کے طور پر کھیلنے کی دعوت کو ڈھونگ قرار دیا ہے، ’’ میں جانتا ہوں کہ میرے مداحوں کا حق ہے کہ میں برازیل کے خلاف میچ کھیلوں، لیکن سیدھی بات ہے میں یہ دعوت قبول نہیں کر سکتا۔‘‘ بورڈ کے جنرل سیکریٹری وولف گانگ نیئرزباخ نے بالاک کے اس ردعمل پر افسوس ظاہر کیا ہے،’’ مارچ سے قومی ٹیم کے کوچ مشاعیل کے ساتھ مسلسل رابطے میں ہیں اور ان کے ساتھ تمام امور پر انتہائی ایمانداری سے بات کی، وہ اس کا حقدار ہے۔‘‘

کہا جا رہا ہے کہ یوآخم لوو نے مارچ کے وسط میں بالاک پر واضح کر دیا تھا کہ اب قومی ٹیم میں ان کی جگہ نہیں۔

بنیادی طور پر مڈ فیلڈ میں کھیلنے والے بالاک نے 1999ء میں قومی فٹ بال ٹیم کے لیے پہلے بار کھیلنا شروع کیا اور اب تک 98 مقابلوں میں 42 گول کر چکے ہیں۔ زخمی ہونے کے سبب وہ 2010ء کا عالمی کپ نہیں کھیل سکے اور تب ہی سے ٹیم سے باہر ہیں۔

رپورٹ: شادی خان سیف

ادارت: عابد حسین