امریکی قونصل خانے کے دو ملازمین بم دھماکے میں ہلاک

پاکستانی شہر پشاور میں قائم امریکی قونصل خانے کے دو پاکستانی ملازمین ایک بم حملے میں ہلاک ہو گئے ہیں۔ امریکی دفتر خارجہ کے ترجمان جان کربی نے اس حملے کی شدید مذمت کی ہے۔ ان کے بقول یہ واقعہ منگل یکم مارچ کو اس وقت پیش آیا، جب پشاور میں واقع امریکی قونصل خانے کے ملازمین انسداد منشیات کے پاکستانی ادارے کے ایک قافلے کے ہمراہ قبائلی علاقے مہمند ایجنسی سے گزر رہے تھے۔ اس دوران سڑک کے کنارے نصب بم پھٹ گیا اور یہ قافلہ اُس کی زَد میں آ گیا۔ اس واقعے میں چند فوجی بھی زخمی ہوئے ہیں۔ ابھی تک کسی بھی تنظیم نے اس حملے کی ذمہ داری قبول نہیں کی ہے۔