يونان بچت اور اصلاحات کی تحريری ضمانت دے: يورو گروپ

جہاں يونان کی سياسی پارٹياں وسيع تر قومی اتحاد کی حکومت بنانے کی کوششوں ميں مصروف ہيں، وہاں يورو گروپ کے ممالک کے وزرائے خزانہ نے يونان سے مطالبہ کيا ہے کہ اُس کی دونوں اہم سياسی جماعتيں اکتوبر کے آخر ميں ہونے والی يورپی يونين کی سربراہی کانفرنس ميں طے پانے والے بچت اور اصلاحات کے پروگرام کو تحريری طور پر تسليم کريں۔ اس موقعے پر يورپی يونين کے مالياتی کمشنر اولی رين نے، جو عام طور پر ايک محتاط شخص ہيں يونان کے اب تک کے وزير اعظم پاپاندريو کے طرز عمل پر بہت کھل کر تنقيد کی اور کہا: ’’ہم اپنا کام کر رہے ہيں اور يونان سے اميد رکھی جاتی ہے کہ وہ اپنے حصے کا کام کرے۔ ميرا خيال ہے کہ ميں تنہا شخص نہيں ہوں، جسے يہ احساس ہوا کہ پاپاندریو کی طرف سے 27 اکتوبر کی سربراہی کانفرنس کے سمجھوتوں پر يونان ميں عوامی ريفرنڈم کرانے کا يکطرفہ فيصلہ اعتماد کو مجروح کرنے والا قدم تھا۔‘‘

يورو گروپ کے قائد ژاں کلود يُنکر پاپاندريو کے اس اقدام پر صرف برہم ہی نہيں ہيں بلکہ انہوں نے يونان کی پوری سياست پر ناکام ہو جانے کا الزام لگايا، کيونکہ اُس نے اتنے شديد بحران ميں اجتماعی کوشش شروع کرنے ميں اتنا زيادہ وقت لگا ديا: ’’آپ کو معلوم ہونا چاہيے کہ جرمنی، ہالينڈ، بيلجيئم یا آسٹريا کے عوام کو يہ سمجھانا کتنا دشوار ہے کہ اُنہيں يونان سے يکجہتی کا اظہار کرنا چاہيے، جبکہ خود يونان ميں صورتحال کے مشترکہ تجزيے اور ايک قومی اتفاق رائے پر آمادگی نہ ہو۔‘‘

اگر يونان ميں سب کچھ صحيح ہوتا رہے اور پارٹياں بچت کے پروگرام پر عمل کا عہد کر ليں تو اُسے رواں امدادی پيکج سے آٹھ ارب يورو کی رقم دے دی جائے گی۔

يورو زون کی تيسری بڑی معيشت اٹلی پر يونان کے بعد سب سے زيادہ قرضے واجب الادا ہيں اور يورو زون کے وزرائے ماليات کو اٹلی کی طرف سے بھی بہت فکر ہے۔ اٹلی کو سن 2013 تک اپنے بجٹ کے خسارے پر قابو پانا، پنشن کی عمر بڑھا کر 67 سال کرنا اور اپنی روزگار کی منڈی کو کھولنا ہے۔

رپورٹ: کرسٹوف ہاسل باخ / شہاب احمد صديقی

ادارت: افسر اعوان