1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

ٹینس: وینس ولیمز یو ایس اوپن سے دستبردار

1 ستمبر 2011

سابق عالمی نمبر ایک کھلاڑی وینس ولیمز بیماری کے باعث نیویارک میں جاری ٹینس کے گرینڈ سلیم یو ایس اوپن سے دستبردار ہوگئی ہیں۔

https://p.dw.com/p/12RJM
وینس ولیمزتصویر: AP

امریکی ٹینس کھلاڑی اور سابق عالمی نمبر ایک ٹینس اسٹار وینس ولیمز نے دوسرے راؤنڈ کا میچ شروع ہونے سے ایک گھنٹے قبل میچ میں شرکت سے معذرت کر لی۔ میچ سے دستبرداری کی وجہ انہوں نے کچھ عرصے لاحق بیماری بتائی ہے۔ وینس کا دوسرے راؤنڈ کا میچ جرمنی کی کھلاڑی زابینے لسیکی کے خلاف تھا۔ وینس کی دستبرداری کے بعد لسیکی یو ایس اوپن کے تیسرے راؤنڈ میں پہنچ گئی ہیں۔

Venus und Serena Williams
وینس ولیمز اور سیرینا ولیمز ٹینس کی دنیا کی تاریخ ساز بہنیں ہیں۔تصویر: AP

وینس ولیمز کی یو ایس اوپن سے دستبرداری کی خبر امریکی عوام پر بجلی کی طرح گری۔ وینس کی جانب سے جاری کردہ ایک بیان میں کہا گیا، ’’میں کچھ عرصے سے ایک بیماری کا شکار ہوں، جس کی وجہ سے میری توانائی میں کمی واقع ہو رہی ہے اور میں تھکاوٹ محسوس کرتی ہوں۔‘‘ خدشہ ہے کہ وینس کی بیماری ان کے کیرئیر کا اختتام بھی کر سکتی ہے۔

وینس ولیمز نے امید ظاہر کی ہے کہ وہ علاج کے بعد جلد ٹینس کے مقابلوں میں دوبارہ شمولیت اختیار کریں گی، تاہم مبصرین کا کہنا ہے کہ وہ شاید اب اپنے عروج کے زمانے کی کارکردگی پیش نہ کر سکیں۔ وینس کی عمر اکتیس برس ہے اور انہوں نے پچھلے تین برس میں کوئی گرینڈ سلیم نہیں جیتا۔

وینس ولیمز اور سیرینا ولیمز ٹینس کی دنیا کی تاریخ ساز بہنیں ہیں۔ وینس نے سنگل مقابلوں میں سات گرینڈ سلیم جیتے ہیں۔ خواتین کے ڈبلز اور مکسڈ ڈبلز گرینڈ سلیمز ملا کر یہ تعداد اکیس ہے۔

رپورٹ: شامل شمس⁄  خبر رساں ادارے

ادارت: عاطف توقیر