چارسدہ کے دلفریب رنگ واپس لوٹنے لگے

ضلع چارسدہ میں سردریاب ایک سیاحتی مقام ہے۔ مقامی افراد اپنے اہل خانہ کے ساتھ یہاں سیر کرنے آتے ہیں۔

سردریاب دریائے کابل کے کنارے واقع ہے اور پشاور روڈ سے لگ بھگ بیس کلومیٹر دور ہے۔ یہاں مقامی افراد کشتی کی سیر سے لطف اندوز ہونے آتے ہیں۔

خیبر پختونخوا سے تعلق رکھنے والے میڈیا کے طالب علم زین اللہ کے مطابق سردریاب کی تَلی ہوئی مچھلی کو بہت پسند کیا جاتا ہے۔ تصویر میں دیکھا جاسکتا ہے کہ ایک قصائی مچھلی پکانے کی تیاری میں مصروف ہے۔

سردریاب میں بچے ایک ٹھیلے سے بھنے ہوئے مکئی کے دانے لے رہے ہیں۔ خیبر پختونخوا کی مکئی اپنے ذائقے کی وجہ سے بہت مشہور ہے۔

زین اللہ کے مطابق چارسدہ نے متعدد دہشت گردانہ کاروائیوں کا سامنا کیا ہے۔ کئی خاندان ایسے ہیں جنھوں نے اپنے پیاروں کو دہشت گردانہ حملوں میں کھو دیا ہے۔ لیکن یہاں کے لوگ ایک مرتبہ پھر اپنی زندگی میں خوبصورت رنگ بھرنا چاہتے ہیں۔

چارسدہ اور اس کے آس پاس کے دیہاتوں میں روٹی تندور میں لگائی جاتی ہے۔ اس تصویر میں ایک کمہار مٹی سے تندور بنا رہا ہے۔

ضلع چارسدہ کی کھدر نہ صرف پاکستان بلکہ بیرون ملک بھی اپنے اعلیٰ معیار کے باعث بہت پسند کی جاتی ہے۔ دیکھیے ایک کاریگر کتنی مہارت سےکھدر کی بنائی کر رہا ہے۔

چارسدہ کے علاقے ’رجڑ‘ میں اکثر گھروں میں کپڑا بنانے کی کھڈیاں موجود ہیں۔ گرمیوں میں ان چھوٹے کارخانوں میں کھدر کی چادریں اور کپڑا بنتا ہے اور سردیوں میں اُن کی فروخت کی جاتی ہے۔