چار سالہ بنگالی بچہ پُر اسرار بیماری میں مبتلا

ڈھاکا کے سب سے بڑے ہسپتال کے ڈاکٹرز با یزید شکدر نامی اس بچے کی حالت زار کا علم ہونے کے بعد اس کے مرض کی بلا معاوضہ تشخیص اور علاج پر رضامند ہو گئے ہیں۔ بایزید شکدر کا تعلق ایک غریب کسان گھرانے سے ہے۔ با یزید جسم اور چہرے پر لٹکتی ہوئی اضافی کھال کے ساتھ پیدا ہوا ہے۔ اس کے علاوہ وہ دل سے متعلق اور سماعت و بصارت کے مسائل سے بھی دو چار ہے۔

با یزید کے والد لابلو شکدر کا کہنا ہے کہ اب تک کئی ایک ڈاکٹرز ان کے بیٹے کی اس حالت کی وجہ معلوم کرنے میں ناکام رہے ہیں۔ شکدر نے ڈھاکا کے میڈیکل کالج ہسپتال میں خبر رساں ادارے اے ایف پی کو بتایا ،’’ہم نے مقامی ہسپتالوں میں اس کے علاج کے لیے اپنی زمین بیچ دی۔ اس کے علاوہ ہم اسے روحانی علاج کرنے والوں اور حکیموں کے پاس بھی لے کر جا چکے ہیں لیکن اس کی حالت میں کوئی تبدیلی نہیں آئی۔ یہ ہسپتال ہماری آخری امید ہے۔‘‘ ڈاکٹرز نے ابتدائی طور پر شبہ ظاہر کیا ہے کہ بایزید ’پروجیریا ‘ نامی بیماری میں مبتلا ہو سکتا ہے۔

اس بیماری میں پیدائش کے فوراً بعد تیزی سے اور قبل از وقت عمر میں اضافہ ہوتا ہے جو صحت کے معاملات میں مزید پیچیدگیوں کا سبب بنتا ہے۔ ہالی ووڈ کی ایک فلم ’دی کیوریس کیس آف بنجمن بٹن ‘ نامی فلم بھی انسانی جسم میں پیدا ہونے والے ایک ایسے ہی انوکھےجینیاتی خلل پر بنائی گئی تھی۔ ڈھاکا کے میڈیکل کالج ہسپتال کے’برن اینڈ پلاسٹک سرجری یونٹ‘ کے سربراہ ڈاکٹر ابو الکلام کے مطابق پروجیریا میں وقت کے ساتھ ساتھ عمر بڑھنے کے عمل میں تیزی آتی ہے۔ تاہم بایزید کے والدین کا کہنا ہے کہ اس کے عمر میں اضافے کا عمل حال ہی میں رک گیا ہے اور بہتری کی علامات ظاہر ہو رہی ہیں۔

ڈاکٹر ابولکلام کا کہنا تھا،’’ہم اس کی حالت کی جانچ پڑتال کر رہے ہیں۔ کھال کے لٹکنے کے علاوہ بایزید کو دل، کانوں، آنکھوں اور عضو تناسل میں بھی مسائل ہیں۔‘‘ ڈاکٹرز کی رائے میں بایزید کی اس جینیاتی حالت کی وجہ قریبی رشتہ داروں میں شادیاں ہونا بھی ہو سکتی ہے۔ بنگلہ دیش کے دیہی علاقوں میں یہ رواج عام ہے۔

بایزید کی والدہ خاتون کا تاہم اصرار ہے کہ ان کا بچہ دوسرے بچوں کی طرح عام بچہ ہی تھا۔ گزشتہ ہفتے کے اختتام پر بایزید کی پُر اسرار بیماری کا معاملہ بنگلہ دیش کے ذرائع ابلاغ میں آنےکے بعد اس کی والدہ نے اے ایف پی کو بتایا،’’میرا بیٹا مچھلی اور چاول بہت شوق سے کھاتا ہے۔ وہ اپنے کزنز کے ساتھ فٹ بال اور چھپن چھپائی بھی کھیلتا ہے۔‘‘ خاتون کا کہنا تھا کہ جب انہوں نے پہلی مرتبہ اپنے بیٹے کو اس حالت میں دیکھا تو وہ کھال کی ایک پوٹلی بنا ہوا تھا۔ لیکن ان کا خیال تھا کہ وہ جلد ہی ٹھیک ہو جائے گا۔

خیال رہے کہ اسی ہسپتال کے ڈاکٹرز ایک چھبیس سالہ شخص کا علاج بھی کرتے رہے ہیں جسے ’’ٹری مین ‘‘ کا نام دیا گیا تھا۔ اس شخص کے ہاتھوں اور پیروں پر عجیب و غریب اور بڑے پیمانے پر درخت کی چھال کے جیسی نشو و نما ہو گئی تھی۔