’چیونٹیاں کھانے والا چھ دن تک بغیر پانی کے زندہ‘

مقامی پولیس نے منگل کے روز بتایا کیا گزشتہ بدھ کو ریگ فوگڈی نامی یہ شوقیہ شکاری مغربی آسٹریلیا میں واقع گریٹ وکٹوریا صحرا میں ایک اونٹ کے تعاقب میں اپنی گاڑی سے نکلا تھا اور گم ہو گیا۔ یہ گاڑی اس کا بھائی ہی چلا رہا تھا۔ بدھ کی شام اس واقعے کے بعد گاڑی میں موجود بھائی نے خاصا انتظار کرنے کے بعد حکام کا فوگڈی کی گم شدگی کی اطلاع دی اور اس شکاری کی کھوج شروع کر دی گئی۔

پولیس کے مطابق یہ شخص اس دوران اس صحرائی اور انتہائی گرم علاقے میں پانی کے بغیر زندہ رہا اور سیاہ چونٹیاں پکڑ پکڑ کا کھاتا رہا۔

پولیس کے مطابق منگل کے روز یہ شخص گم شدگی کے مقام سے 15 کلومیٹر دور ایک جگہ پر ایک درخت کے نیچے بیٹھا تھا اور حواس باختہ تھا۔

پولیس کا کہنا ہے کہ آخری دو روز اس شخص نے اس درخت کے نیچے بیٹھے بیٹھے چونٹیاں کھانے میں گزارے۔ مقامی پولیس سپریٹنڈنٹ گریٹ ووڈ کے مطابق، ’جب ہم نے اسے ڈھونڈا، اس وقت اس کے جسم میں پانی کی شدید کمی تھی، یہ سمت کے تعین سے محروم ہو چکا تھا اور اس کے ہوش و حواس قائم نہیں تھے۔‘

پولیس نے بتایا کہ اس موقع پر طبی عملہ فوری طور پر طلب کیا گیا، جہاں فوگڈی کو مائعات دیے گئے، جس کے بعد جلد اس کی طبیعت بحال ہونے لگی۔

’’اچھی خبر یہ ہے کہ اب یہ بیٹھ کر ہم سے باتیں کرنے کے قابل ہو گیا ہے۔‘

بتایا گیا ہےکہ آسٹریلیا کی ’فلائنگ ڈاکٹر سروس‘ نے اسے برآمدگی کے مقام سے ہیلی کاپٹر کے ذریعے قریب واقع کیلگورلی ہسپتال منتقل کیا، جہاں اب یہ داخل کر لیا گیا ہے اور اس کی طبیعت مستحکم ہے۔

پولیس کا کہنا ہے کہ 37 درجہ حرارت میں یہ دونوں بھائی شکار کے دورے کے بعد شمال مشرقی علاقے لیورٹن کی جانب جا رہے تھے۔ شکار کے مقام سے یہ علاقہ 170کلومیٹر دور تھا، جب فوگڈی ایک اونٹ کو شکار کرنے کے چکر میں گاڑی سے نکلا اور گم ہو گیا۔ پولیس کے مطابق اس وقت فوگڈی نے ایک ٹی شرٹ، جانگیا اور ٹوپی پہن رکھی تھی۔ پولیس کا کہنا ہے کہ اتنے روز تک بغیر خوراک اور پانی کے فوگڈی کا زندہ رہ جانے کسی معجزے سے کم نہیں۔