1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں

یورپی یونین کا اجلاس: یونان کا بحران سر فہرست

23 جون 2011

آج جمعرات کے روز یورپی یونین کے رہنماؤں کا ایک اہم اجلاس برسلز میں ہو رہا ہے جس میں یورو زون اور بالخصوص یونان کا مالیاتی بحران نمایاں موضوعات ہیں۔

https://p.dw.com/p/11hzZ
تصویر: DW

یورپی یونین کا اجلاس ایک ایسے وقت ہو رہا ہے جب تمام نگاہیں یونان میں جاری مالیاتی بحران پر ٹکی ہیں۔ اس اجلاس میں یونان سے متعلق پیش رفت عالمی منڈیوں کے لیے ایک نیک شگون ثابت ہو سکتی ہیں۔

اس حوالے سے ستائیس رکنی یورپی یونین کے اس سربراہی اجلاس میں یورپی رہنماؤں پر بین الاقوامی مالیاتی فنڈ، امریکہ اور عالمی منڈیوں کا بے حد دباؤ ہے۔ ان رہنماؤں سے اس دو روزہ اجلاس میں اہم پیش رفت کی توقع کی جا رہی ہے۔

NO FLASH Griechenland Proteste
یونان میں حکومت کے بچتی پروگرام اور نج کاری کی کوششوں کی وسیع پیمانے پر مخالفت کی جا رہی ہےتصویر: dapd

یونان کا بحران اس قدر شدید ہے کہ یورپی یونین پر اس کے واضح اثرات پڑنا شروع ہو گئے ہیں، اور کل تک شجر ممنوعہ سمجھی جانے والی بات بھی اب تواتر کے ساتھ کہی جا رہی ہے کہ اگر یہ بحران حل نہ ہوا تو شاید اس بلاک کا مستقبل ہی خطرے میں پڑ جائے۔ یونان میں حکومت کے بچتی پروگرام اور نج کاری کی کوششوں کی وسیع پیمانے پر مخالفت کی جا رہی ہے۔ حالانکہ وزیر اعظم جارج پاپاندریو ملکی پارلیمان سے اعتماد کا ووٹ لینے میں کامیاب ہو گئے ہیں، اس بات کا فیصلہ کرنا مشکل ہے کہ یونانی معیشت کا اونٹ کس کروٹ بیٹھے گا۔

لکسمبرگ میں ہونے والے یوروزون کے وزرائے خزانہ کے اجلاس میں یونان کے لیے ہنگامی امداد کو مؤخر کر دیا گیا تھا۔ یورپی یونین نے یونان پر واضح کر دیا ہے کہ اسے بچتی پروگرام پر عمل درآمد ہر حال میں ممکن بنانا پڑے گا تبھی اسے قرضے کی پانچویں قسط ملے گی۔

یورپی یونین کے سربراہی اجلاس میں یونان کے علاوہ دیگر اہم موضوعات پر بھی تبادلہ خیال ہوگا۔ ان میں لیبیا کی صورت حال اور شینگن زون سے متعلق معاملات شامل ہیں۔

رپورٹ: شامل شمس⁄ خبر رساں ادارے

ادارت: افسر اعوان

اس موضوع سے متعلق مزید سیکشن پر جائیں