یورپی یونین کا سربراہی اجلاس

اس اجلاس میں 27 رکن ملکوں کے ریاستی و حکومتی سربراہ حصہ لے رہے ہیں۔ یورپی یونین کی صدارتی مدت ختم ہونے سے قبل فرانس کے صدر نکولا سارکوزی مذاکراتی میزپرآخری بڑی کامیابی چاہتے ہیں۔ وہ تین بڑے موضوعات معیشی ترقی، ماحولیاتی تحفظ اور آئینی اصلاحات کے بارے میں ٹھوس پیش رفت کے خواہش مند ہیں۔

خود یورپی کمیشن کے صدر Barroso کے نزدیک یہ کانفرنس یونین کے لئے ایک سخت امتحان کا درجہ رکھتی ہے۔ خاص طور پراس حوالے سے کہ قومی اورمشترکہ یورپی مفادات کو کیوں کریکجا کیا جا سکتا ہے تا کہ عالمی چیلنجوں سے بہتر طریقے سے عہدہ برا ہوا جا سکے۔

کانفرنس کے دوران یورپی کمیشن کی طرف سے تجویز کردہ 200 ارب یورو کا یورپی اقتصادی پیکج زیربحث لایا جا رہا ہے۔

کانفرنس میں لزبن معاہدے کی توثیق کےحوالے یہ بات طے شدہ نظر آتی ہے کہ آئرلینڈ کی حکومت اگلے سال ایک بار پھر لزبن معاہدے کی توثیق کے لئے ریفرنڈم کرائے گی۔ پہلے ریفرنڈم میں ائرلینڈ کے عوام کی اکثریت نے اس معاہدے کے خلاف ووٹ دیا تھا۔