114 افراد کے ساتھ زیادتی، سوئس باشندے کا اعتراف

سوئٹزرلینڈ کی پولیس کے مطابق زیرحراست اس شخص نے جرمنی اور سوئٹزرلینڈ کے مختلف نرسنگ ہومز میں داخل افراد کو اپنی ہوس کا نشانہ بنایا۔ خبر رساں ادارے روئٹرز نے سوئس پولیس کا حوالہ دیتے ہوئے کہا ہے کہ 54 سالہ اس سماجی کارکن نے گزشتہ انتیس برسوں کے دوران معذور بالغوں کے ساتھ بھی جسمانی زیادتی کی۔

اطلاعات کے مطابق اس شخص کو گزشتہ سال اپریل میں اس وقت گرفتار کیا گیا تھا، جب ایک نرسنگ ہوم میں داخل دو معذور بالغ افراد نے اپنے والدین کو شکایت لگائی کہ انہیں جنسی زیادتی کا نشانہ بنایا گیا ہے۔

پولیس کے مطابق اس شخص نے 114 افراد کے ساتھ جسمانی زیادتی جبکہ آٹھ واقعات میں مختلف لوگوں کو جنسی طور پر حراساں کرنے کا اعتراف کر لیا ہے۔ پولیس کے مطابق اس شخص نے جن بچوں یا بالغ نوجوانوں کا نشانہ بنایا، ان میں زیادہ تر شدید ذہنی یا جسمانی امراض کا شکار تھے۔

پولیس نے تصدیق کی ہے کہ سماجی طور پر کام کرنے والے اس شخص نے ایک سالہ بچے کو بھی اپنی جنسی تشنگی بجھانے کے لیے نشانہ بنایا۔ پولیس نے اسے سنگین ترین جرم قرار دیا ہے۔ یہ شخص 1982ء سے جرمنی اور سوئٹزرلینڈ کے نو مختلف نرسنگ ہومز میں کام کر چکا ہے۔

ملزم کے خلاف پہلے بھی تفتیش کی گئی تھی، جس میں الزام عائد کیا گیا تھا کہ سن 2003ء میں اس نے تیرہ سالہ ایک ایسی بچی سے زیادتی کی تھی، جس کا دماغی توازن درست نہیں تھا۔ تاہم یہ الزام اس لیے واپس لے لیا گیا تھا کیونکہ ڈاکٹروں کو اس لڑکی کے کہنے پر شک ہو گیا تھا۔

رپورٹ: عاطف بلوچ

ادارت: شادی خان سیف