آسٹریلین اوپن، جوکووچ نے پانچویں بار اپنے نام کر لیا

اتوار کے دن ملبورن پارک میں کھیلے گئے مردوں کے سنگلز مقابلوں کے اس فائنل میں سرب کھلاڑی جوکووچ نے ستائیس سالہ مرے کو چار سیٹوں میں ہی مات دے دی۔ انہوں نے یہ مقابلہ سات چھ، چھ سات، چھ تین اور چھ صفر سے اپنے نام کیا۔ یوں جوکووچ نے آسٹریلین اوپن ٹائٹل پانچویں مرتبہ اپنے نام کیا جبکہ مجموعی طور پر ان کے گرینڈ سلام ٹائٹلز کی تعداد آٹھ ہو گئی ہے۔

مرے کو آسٹریلین اوپن کے فائنل میں چوتھی مرتبہ شکست کا سامنا کرنا پڑا ہے۔ 2011ء اور 2013ء میں بھی مرے جوکووچ کے ہاتھوں شکست کا شکار ہو ئے تھے جبکہ 2010ء میں راجر فیڈرر نے انہیں مات دے دی تھی۔ جوکووچ پانچ مرتبہ آسٹریلین اوپن کے فائنل تک رسائی حاصل کرنے میں کامیاب ہوئے ہیں اور انہیں ان مقابلوں میں ابھی تک کوئی نہیں ہرا سکا ہے۔

اتوار کے دن فائنل میں کامیابی کے بعد خوشی کے عالم میں جوکووچ نے اپنا ٹینس ریکٹ روڈ لیور ایرینا میں بیٹھے ہوئے شائقین کی طرف اچھال دیا۔ اس مقابلے کو دیکھنے کے لیے ماضی کے اسٹار ٹٰینس کھلاڑی روئے ایمرسن بھی میلبورن پارک میں موجود تھے۔ایمرسن نے آسٹریلین اوپن کا ٹائٹل چھ مرتبہ اپنے نام کرنے کا اعزاز حاصل کر رکھا ہے۔

تین گھنٹے اور انتالیس منٹ تک جاری رہنے والے اس میچ کے بعد جوکووچ نے کورٹ میں ایمرسن کی موجودگی پر خوشی کا اظہار کیا اور کہا، ’’مجھے انتہائی خوشی ہے کہ میں نے پانچویں مرتبہ یہ ٹائٹل جیتنے کے اعزاز حاصل کر لیا ہے۔ مجھے خوشی ہے کہ میں ایلیٹ کھلاڑیوں کے اس گروپ میں شامل ہو گیا ہوں، جس میں روڈ لیور، روئے ایمرسن اور دیگر لیجنڈ کھلاڑی بھی شامل ہیں۔‘‘

تقریب انعامات میں اینڈی مرے نے اپنے جذبات کا اظہار کرتے ہوئے کہا، ’’ایک مرتبہ پھر مجھے یہاں شائقین کی طرف سے حیرت انگیز تعاون ملا۔ میں جیت نہیں سکا لیکن مجھے جو اسپورٹ ملی ہے میں اس کا شکر گزار ہوں۔ آئندہ برس میں کوشش کروں گا کہ جب اس مقابلے میں حصہ لینے آؤں تو فائنل میں اس کا نتیجہ کچھ مختلف ہو۔‘‘ مرے اب تک مجموعی طور پر آٹھ گرینڈ سلام ٹورنامنٹس کے فائنل تک رسائی حاصل کرنے میں کامیاب ہوئے ہیں، جن میں سے دو مرتبہ وہ کامیاب بھی رہے ہیں۔

اس فائنل میں کامیابی کے ساتھ یہ امر یقینی ہو گیا ہے کہ نوواک جوکووچ عالمی رینکنگ میں نمبر ایک پر ہی براجمان رہیں گے۔ پیر کے دن نئی اے ٹی پی رینکنگ کا اعلان کیا جائے گا، جس میں مرے اب چوتھے نمبر پر آجائیں گے۔ اس وقت ان کی عالمی رینکنگ چھ ہے۔

ہفتے کے دن امریکی ٹینس اسٹار سیرینا ویلمز نے خواتین سنگلز کے فائنل میں روسی کھلاڑی ماریا شارا پوا کو شکست دے کر چھٹی مرتبہ یہ ٹائٹل اپنے نام کیا تھا۔ عالمی نمبر ایک 33 سالہ خاتون کھلاڑی سیرینا اس کامیابی کے ساتھ انیس گرینڈ سلام ٹائٹلز جیتنے کا اعزاز حاصل کر چکی ہیں۔