اسرائیل مخالف فنکاروں کا بائیکاٹ کرنا کیا ضروری ہے؟

ایک میوزیکل بینڈ کو جرمنی ہی منعقدہ فنونِ لطیفہ کے بین الاقوامی فیسٹول میں پرفارمنس کرنے سے روکنے پر جرمنی میں یہ بحث شروع ہو گئی ہے کہ آیا اسرائیل مخالف فنکاروں کو برلن حکومت کی ناراضی کا سامنا ہو سکتا ہے۔ اگر ایسا ہے تو پھر ان فنکاروں کو مدعو بھی نہیں کیا جانا چاہیے۔

جرمن وفاقی ریاست نارتھ رائن ویسٹ فیلیا میں ہر سال بعد منعقد ہونے والے میوزیکل فیسٹول روہرٹرینالے میں ایک میوزیکل بینڈ ’ینگ فادرز‘ کو ابتدا میں اس بنیاد پر پرفارمنس کی اجازت نہیں دی گئی کیونکہ وہ فلسطین نواز ایک تحریک کا حامی ہے، جو اسرائیل مخالف اور اسرائیلی مصنوعات کے بائیکاٹ کو فروغ دینا چاہتی ہے۔

اسرائیل مخالف تحریک کا نام ’بی ڈی ایس‘ ہے۔ اس میں بی سے مراد بائیکاٹ، ڈی سے مراد سے اسرائیل میں ڈی انویسٹمنٹ یا سرمایہ کاری کی نفی اور ایس یعنی سینکشنز یا مختلف پابندیوں کے لیے ہے۔ ینگ فادرز پاپ موسیقی بینڈ کا تعلق سکاٹ لینڈ سے ہے۔ اس فیسٹول کے دوران اس بینڈ کے دعوت نامے کو پہلے منسوخ کیا گیا اور پھر دوبارہ انہیں مدعو کیا گیا۔

بظاہر معاملہ حل ہو گیا لیکن اس کی وجہ سے منتظمین اور فنکاروں کے درمیان کسی حد تک بدمزگی پائی گئی۔ جرمن شہر بوخم میں یہ فیسٹول نو اگست سے تیئیس ستمبر تک جاری رہے گا۔ روہر علاقے میں بوخم شہر کو بھی شمار کیا جاتا ہے۔

اس تنازعے کے بعد بین الاقوامی شہرت کے حامل اس میوزیکل بینڈ نے فیسٹول کے دورے سے اجتناب کیا۔ یہ امر اہم ہے کہ ینگ فادرز بینڈ کو مرکزی پرائز سے نوازا جا چکا ہے۔ اس تنازعے پر امریکی جریدے نیو یارک ٹائمز اور برطانوی معتبر اخبار دی گارڈین نے بھی مضامین شائع کیے ہیں۔

روہر ٹرینالے کے منتظمین نے اس صورت حال پر سرگرم کارکنوں اور سیاستدانوں کے درمیان ایک مکالمے کا بندوبست بھی کیا۔ یہ مکالمہ ینگ فادرز بینڈ کے لیے مختص وقت پر شیڈیول کیا گیا۔ اس میں بھی کئی مرتبہ بدمزہ صورت حال پیدا ہوئی۔ دوسری جانب اسکاٹ لینڈ کے بینڈ کی حمایت میں برطانیہ کے کئی فنکاروں نے کھل کر بیانات اور حمایت کی ہے۔

روہرٹرینالے میں متنازعہ صورت حال پیدا ہونے پر میلے کی آرٹسٹ ڈائریکٹر اسٹیفنی کارپ کو مختلف حلقوں کی شدید تنقید کا بھی سامنا ہے۔ خاتون ڈائریکٹر کو ینگ فادرز میوزکل گروپ کو مدعو کرنے پر سامیت مخالف بھی قرار دیا گیا۔ ساری صورت حال کے بعد یہ ایک سوال سامنے آیا ہے کہ آیا اسرائیلی حکومتی پالیسیوں کی مخالفت سامیت دشمنی کے مساوی ہے۔ مختلف جرمن حلقے اس سوال کے جواب کی تلاش جاری رکھے ہوئے ہیں۔