برطانوی فٹ بال کلب ليورپول چيمپئنز ليگ کا فاتح

ہسپانوی دارالحکومت ميڈرڈ ميں يکم جون کی شب کھيلے گئے چیمپئنز ليگ کے فائنل میں لیور پول نے ٹوٹن ہیم کو دو صفر سے مات دے کر ٹائٹل اپنے نام کر لیا ہے۔ ليور پول کے ليے محمد صالح اور اوريگی نے ايک ايک گول اسکور کیا۔ انگلش کلب لیور پول نے گزشتہ سات برسوں میں پہلی مرتبہ کوئی ٹرافی جیتنے کا اعزاز حاصل کیا ہے۔ مجموعی طور پر اب يہ کلب چھ مرتبہ چيمپئنز ليگ جيت چکا ہے۔

لیور پول کی ٹيم کے جرمن کوچ ژورگن کلاپ نے اس کامیابی پر کہا ہے کہ مستقبل میں ان کا کلب مزید اچھی کارکردگی کا مظاہرہ کرے گا۔ کلاپ اس سے قبل چھ مختلف ٹيموں کے ساتھ کسی بڑے فٹ بال ٹورنامنٹ کے چھ فائنل  میچوں تک پہنچ چکے تھے تاہم يہ پہلا موقع تھا کہ وہ فائنل ميں سرخرو ہوئے۔

2016ء ميں يوروپا ليگ فائنل اور پچھلے سال چيمپئنز ليگ کے فائنل ميں شکست کے بعد اس بار ليورپول نے موقع ہاتھ سے نہ جانے ديا۔ مصری فارورڈ محمد صالح نے شروع ہی ميں ايک پينلٹی پر گول اسکور  کر ديا جبکہ آخری لمحات ميں ڈيوک اوريگی نے ايک اور گول کرتے ہوئے اپنی ٹيم کی جيت کو يقينی بنا ديا۔ برطانوی کلب فٹ بال ميں سن 2012 ميں ليگ کپ کے فائنل ميں کارڈف سٹی کو ہرانے کے بعد يہ ليور پول کی کسی بڑے ٹورنامنٹ ميں پہلی ٹرافی ہے۔

اس کاميابی کا سہرا ليورپول کے جرمن کوچ ژورگن کلاپ کو بھی جاتا ہے جن کی حمکت عملی کو اس وقت دنيائے فٹ بال ميں سراہا جاتا ہے۔ بعد ازاں کلاپ نے بات چيت ميں کہا، ’’اب ہمارے پاس کچھ ہے اور ہم اس کے ساتھ آگے بڑھيں گے۔‘‘

ع س / ع ب، نيوز ايجنسياں