بنڈس لیگا: ڈورٹمنڈ پھر کامیابی کی پٹری پر

گزشتہ ہفتے شٹٹ گارٹ کے ساتھ میچ برابر کرنے والی لیگ کی یہ ٹاپ ٹیم اس وقت بھی دیگر ٹیموں کے مقابلے میں واضح فرق سے لیگ پوائنٹس ٹیبل پر سبقت لئے ہوئے ہے۔ اس فتح کے ساتھ اب ڈورٹمنڈ کے مجموعی پوائنٹس کی تعداد 50 ہوگئی ہے۔ بنڈس لیگا کے موجودہ سیزن میں اب تک کھیلے گئے 20 میچوں میں ڈورٹمنڈ کی یہ 16ویں فتح تھی۔ اس طرح اس وقت لیگ میں ڈورٹمنڈ کو پوائنٹس ٹیبل پر دوسرے نمبر کی ٹیم لیورکوزن کے مقابلے میں11پوائنٹس کی برتری حاصل ہے۔ لیورکوزن نے جمعے کے روز ہینوور کو صفر کے مقابلے میں دو گول سے شکست دے کر لیگ میں دوسری پوزیشن پر قبضہ کر لیا تھا۔

ہفتے کے روز کھیلے گئے ایک اور میچ میں دفاعی چیمپئن بائرن میونخ نے بریمن کو ایک کے مقابلے میں تین گول سے شکست دے کر لیگ میں اپنی پوزیشن کو قدرے مضبوط کیا ہے۔ اس فتح کے ساتھ اب بائرن میونخ کے پوائنٹس کی مجموعی تعداد 36 ہوگئی ہے۔ بریمن کی ٹیم نے گزشتہ گیارہ میچوں میں سے صرف دو جیتے ہیں اور لیگ میں اس کی پوزیشن انتہائی کمزور ہے۔

ہفتے کے روز کھیلے گئے ایک اور میچ میں مائنز نےکائزرزلاؤٹرن کو صفر کے مقابلے میں ایک گول سے شکست دی۔ اس فتح کے ساتھ مائنز کی ٹیم کے پوائنٹس کی مجموعی تعداد 36 ہوگئی ہے اور لیگ میں وہ چوتھی پوزیشن پر ہے۔

گزشتہ روز کھیلے گئے دیگر میچوں میں نیورمبرگ نے ہیمبرگ کو صفر کے مقابلے میں دو گول سے شکست دی۔ اس کے علاوہ سینٹ پاؤلی نے کولون کو تین صفر سے ہرا دیا۔ شالکے اور ہوفن ہائم کے درمیان کھیلا گیا میچ شالکے کی شکست پر ختم ہوا۔ اس میچ میں ہوفن ہائم نے ایک صفر سے کامیابی حاصل کی۔

رواں میچ ڈے کے سلسلے میں اتوار کے روز دو میچ کھیلے جائیں گے۔ ان میں ایک شٹٹ گارٹ اور فرائی برگ کے درمیان ہو گا جبکہ دوسرے میں فرینکفرٹ اور میونشن گلاڈباخ کی ٹیمیں آمنے سامنے ہوں گی۔

رپورٹ : عاطف توقیر

ادارت : عدنان اسحاق