بوسنیا کے لیے مہاجرین کا بوجھ ناقابل برداشت ہونے لگا

معاشی لحاظ سے کمزور مشرقی یورپی ملک بوسنیا میں مہاجرین کی آمد میں واضح اضافہ دیکھا گیا ہے۔ ان میں زیادہ تعداد ایسے نوجوان افراد کی ہے جو بوسنیا کے پڑوسی ملک کروشیا کے راستے یورپی یونین کی حدود میں داخل ہو نا چاہتے ہیں۔

تاہم شکستہ بنیادی ڈھانچے،کمزور اداروں اور تقریباﹰ نہ ہونے کے برابر فنڈز کے ساتھ بوسنیا اتنی بڑی تعداد میں مہاجرین کا بوجھ برداشت کرنے کے قابل نہیں۔

مہاجرین کے لیے کام کرنے والی امدادی تنظیموں کے ارکان کا کہنا ہے کہ اُن کے لیے بھی امدادی کاروائیاں جاری رکھنا مشکل ہوتا جا رہا ہے۔ امدادی تنظیم ریڈ کراس کے ایک اہلکار سلام میڈجچ کے بقول،’’یہ تھکا دینے والا ہے۔ ہم سے جو بن پڑا ہم کریں گے لیکن ہم بھی ایک حد تک ہی مدد کر سکتے ہیں۔‘‘

سلام میڈجچ کے مطابق وہ ہر روز سراجیوو سے بسوں پر سو کے قریب مہاجرین آتے دیکھ رہے ہیں۔ بوسنیا میں سلامتی کے وزیر ڈریگن میکٹچ کا کہنا ہے کہ سن 2018 میں اب تک 5100 مہاجرین کے غیر قانونی داخلے رجسٹر کیے گئے ہیں۔ علاوہ ازیں تین ہزار تین سو تارکین وطن ایسے بھی تھے سربیا اور مونٹینیگرو کے مابین سرحد پر ملک میں داخل ہونے سے روک دیا گیا تھا۔

ان تارکین وطن میں بچے اور خاندان بھی شامل ہیں لیکن زیادہ تعداد نوجوان تارکین وطن کی ہے۔ چھبیس سالہ پاکستانی تارک وطن نواب، جو اپنا مکمل نام ظاہر نہیں کرنا چاہتا، نے اے ایف پی کو بتایا کہ وہ دو سال سے سفر کر رہا ہے۔ نواب نے بتایا،’’میں آج رات بارڈر پار کرنے کی کوشش کروں گا۔ پہلے میں اٹلی جاؤں گا اور پھر اسپین، جہاں میرے چچا رہتے ہیں۔‘‘ ایک اور پاکستانی مہاجر ستائیس سالہ حامد کا کہنا تھا کہ اس نے تین بار سرحد عبور کر کے کروشیا جانے کی کوشش کی لیکن ناکام رہا۔

عالمی ادارہ مہاجرت کے بوسنیا میں مشن کے سربراہ پیٹر فان ڈیئر آورائیرٹ کا کہنا ہے کہ بوسنیا میں اس وقت ڈھائی ہزار کے قرین پناہ گزین ہیں جس کا ایک مطلب یہ بھی ہے کہ زیادہ تر مہاجرین سرحد پار کر کے یورپی یونین کے رکن ممالک میں داخل ہونے میں کامیاب ہو گئے ہیں۔

فان ڈیئر آورائیرٹ کے مطابق مہاجرین کے حوالے سے بوسنیا میں صورت ‌حال خراب ہو رہی ہے۔ آئی او ایم کے بوسنیا مشن کے سربراہ کے بقول،’’جب مہاجرین یہاں پہنچتے ہیں تو وہ تھکے ماندے ہوتے ہیں۔ حکومت کو ان کی رہائش کے مناسب انتظامات کرنے چاہیئں۔‘‘

ص ح/ اے ایف پی