جنوبی افریقی اولمپک اسٹار دانستہ قتل کے مقدمے میں بری

پریٹوریا ہائی کورٹ کی خاتون جج تھوکوزائل ماسیپاThokozile Masipa نے اپنے فیصلے میں کہا کہ اس وقت ستائیس سالہ ملزم پسٹوریئس کے خلاف استغاثہ یہ الزام قابل یقین حد تک ثابت کرنے میں ناکام رہا کہ اس کھلاڑی نے گزشہ برس ویلنٹائن ڈے پر اپنی گرل فرینڈ کو باقاعدہ ارادہ کر کے اور منصوبہ بندی کے تحت قتل کیا تھا۔

جج ماسیپا کے بقول پسٹوریئس کے خلاف جو بھی ثبوت پیش کیے گئے، وہ سب عمومی حالات کی بنیاد جمع کیے گئے تھے اور ان کا لازمی طور پر مطلب یہ نہیں نکلتا کہ ملزم پسٹوریئس حقیقی معنوں میں دانستہ قتل کا مرتکب ہو ا تھا۔

نیوز ایجنسی روئٹرز نے لکھا ہے آج کا عدالتی فیصلہ آسکر پسٹوریئس کے لیے کچھ اطمینان کا سبب بنا ہو گا کیونکہ مجرم قرار دیے جانے کی صورت میں اسے عمر قید تک کی سزا سنائی جا سکتی تھی۔ اس کا مطلب یہ ہوتا کہ وہ جلد از جلد بھی پچیس سال بعد مشروط طور پر رہا کیا جا سکتا تھا۔

روئٹرز کے مطابق دانستہ قتل کے الزام سے بری ہو جانے کے بعد پسٹوریئس کو ابھی بھی طیش میں آ کر قتل کرنے کے الزام میں مجرم قرار دیا جا سکتا ہے۔

عدالت نے اسے جس الزام سے بری کیا ہے، وہ صرف سوچے سمجھے قتل کے بارے میں تھا۔ ’قابل سزا انسانی ہلاکت‘ کا قصور وار ٹھہرائے جانے کی صورت میں جنوبی افریقہ کے اس بہت مشہور ایتھلیٹ کو طویل مدت کی سزائے قید ابھی بھی سنائی جا سکتی ہے۔

آسکر پسٹوریئس کے خلاف یہ مقدمہ اس کھلاڑی کی شہرت کی وجہ سے ملکی اور غیر ملکی میڈیا سمیت بین الاقوامی توجہ کا مرکز بنا ہوا تھا۔ قریب ڈیڑھ مہینے تک سماعت کے بعد سیاہ فام جج ماسیپا نے آج جو فیصلہ سنایا، اسے سنتے ہوئے پسٹوریئس کی آنکھو ں میں آنسو آ گئے۔ پسٹوریئس پر الزام تھا کہ اس نے گزشتہ برس فروری میں ویلنٹائن ڈے کے دن اپنی گرل فرینڈ اور مشہور ماڈل رِیوا سٹین کامپ Reeva Steenkamp کو دانستہ قتل کر دیا تھا۔

حادثاتی طور پر قتل اور ہتھیاروں سے متعلق دیگر الزامات میں ملزم کے خلاف فیصلے آئندہ سماعت کے بعد مستقبل قریب میں متوقع ہیں۔