جوہری مذاکرات ’ایک ہی دائرے میں‘ گھوم رہے ہیں، یوکیا امانو

انٹرنیشنل اٹامک انرجی ایجنسی کے ڈائریکٹر جنرل یوکیا امانو نے اس ایجنسی کے بورڈ آف گورنرز کے ویانا میں ہونے والے اجلاس کے دوران مذاکرات کے بے ثمر ہونے پر اپنے اضطراب کا اظہار کیا۔ یہ بورڈ آف گورنرز  35 ممالک کے نمائندوں پر مشتمل ہے۔ امانو کا کہنا تھا کہ تہران کے ساتھ مذاکرات ’ایک دائرے میں گھوم رہے ہیں‘۔ ان کا یہ بھی کہنا تھا کہ ایران کے بھاری پانی سے چلنے والے اپنے تحقیقی ری ایکٹر کی تعمیر اور یورینیئم کی افزودگی یو این سکیورٹی کونسل کی 2006ء میں منظور کی گئی قرارداد کی ’واضح خلاف ورزی‘ ہے۔ انہوں نے اس طرح کے اقدامات روکنے کا مطالبہ کیا۔

اقوام متحدہ کی انٹرنیشنل اٹامک انرجی ایجنسی 2012ء سے کوشش کر رہی ہے کہ ایرانی جوہری پروگرام کے ’ممکنہ طور پر فوجی جہت‘ کے حوالے سے پیدا شدہ معاملے کو مذاکرات کے ذریعے حل کیا جائے۔ گزشتہ 17 ماہ کے دوران اس حوالے سے اب تک مذاکرات کے 10 راؤنڈ ہو چکے ہیں، تاہم اس میں کوئی کامیابی ابھی تک سامنے نہیں آ سکی۔ مغربی سفارت کار ان مذاکرات کی ناکامی کی ذمہ داری تہران حکومت پر عائد کرتے ہیں جسے ایران رد کرتا ہے۔

IAEA کے ہیڈکوارٹرز میں بورڈ آف گورنرز کا اجلاس بند کمرے میں ہوا۔ خبررساں ادارے روئٹرز کے مطابق اس اجلاس سے خطاب کی حاصل ہونے والی کاپی میں یوکیا امانو کا کہنا تھا، ’’ایجنسی اور ایران کے درمیان جنوری 2012ء سے جاری بڑے پیمانے پر ہونے والے مذاکرات کے باجود۔۔۔ کوئی معاہدہ عمل میں نہیں آ سکا۔ سچی بات تو یہ ہے کہ کافی وقت سے ہم ایک ہی دائرے میں گھومے جا رہے ہیں۔‘‘ اس حوالے سے یوکیا امانو کا مزید کہنا تھا، ’’یہ ایران سمیت بین الاقوامی برادری کے لیے اس قدر اہم مسائل سے نمٹنے کا مناسب طریقہ نہیں ہے۔‘‘

یوکیا امانو کا کہنا تھا، ’’ہمیں اب مزید کسی تاخیر کے ٹھوس نتائج کی ضرورت ہے تاکہ ایران کی جوہری سرگرمیوں کے حوالے سے بین الاقوامی اعتماد بحال کیا جا سکے۔‘‘

مغربی طاقتوں کو شبہ ہے کہ ایران اپنے سول جوہری پروگرام کی آڑ میں جوہری اسلحہ تیار کرنے کی کوششوں میں ہے، جبکہ ایران کا مؤقف ہے کہ اس کا جوہری پروگرام سول مقاصد کے لیے ہے اور اس کا مقصد ملک کی توانائی کی ضروریات پورا کرنا ہے۔ ایران جوہری اسلحے کی تیاری کی کسی کوشش کی تردید کرتا ہے۔

aba/ah (Reuters)