خاشقجی کا قتل اور علاقائی طاقت کا توازن ترکی کی جانب

بظاہر مشرق وسطیٰ میں ترکی بڑی شدت کے ساتھ ’مسلم بھائی چارے‘ کی کوششیں جاری رکھے ہوئے ہے لیکن اب تک کوئی بڑی کامیابی سامنے نہیں دکھائی دے رہی تھی۔ سعودی صحافی جمال خاشقجی کے قتل کے بعد اس خطے کے سیاسی منظر میں تبدیلی نمودار ہونا شروع ہو گئی ہے۔ اب خاشقجی کے قتل کے بعد سعودی عرب پر بین الاقوامی دباؤ محسوس کیا جاتا ہے اور اس دباؤ کو بڑھانے میں ترکی اپنی کوششیں جاری رکھے ہوئے ہے۔

سعودی قونصل خانے میں رواں برس دو اکتوبر جمال خاشقجی کے قتل نے سعودی عرب کی شہرت کو کسی حد تک داغ دار کر دیا ہے۔ اس قتل میں مبینہ طور پر سعودی ولی عہد شہزادہ محمد بن سلمان کے پس پردہ ہونے کے الزامات بھی دیکھے جا سکتے ہیں۔ مبصرین کا کہنا ہے کہ اس واقعے کے بعد سعوی عرب اور شہزادہ محمد بن سلمان کے تشخص پر انگلیاں اٹھ چکی ہیں اور ایسے میں ان کی سابقہ حیثیت کو بحال ہونے میں وقت درکار ہو گا۔

بین الاقوامی تھنک ٹینک چیتھم ہاؤس میں شمالی افریقہ اور مشرق وسطیٰ کے امور کی ڈائریکٹر لینا خطیب کا خیال ہے کہ خاشقجی کے قتل کے بعد ترک صدر رجب طیب ایردوآن کو ایک سنہرا موقع میسر آیا ہے کہ وہ سعودی عرب کے بجائے ترکی کو مسلم دنیا کا ایک نیا لیڈر بنا سکیں۔ خطیب کے مطابق خاشقجی سے پیدا ہونے والی صورت حال ایک جغرافیائی و سیاسی بحران ہے اور یہ ترکی کے لیے اہمیت کی حامل ہے۔

بعض تجزیہ کاروں کا خیال ہے کہ جو بحرانی کیفیت ہے، وہ اتنی پرزور نہیں کہ وہ سعودی اقتدار میں سے شہزادہ محمد بن سلمان کو ولی عہد کے منصب سے ہٹا سکے۔ اس تناظر میں ترکی کو بھرپور امریکی تائید اور حمایت درکار ہے۔ امریکی منشا کی صورت ہی میں سعودی ایوانِ اقتدار میں کوئی تبدیلی ممکن ہے۔

یہ امر اہم ہے کہ مشرق وسطیٰ میں مصر کی کالعدم قرار دی گئی مذہبی و سیاسی تحریک اخوان المسمون کو بھی ترکی کی حمایت حاصل رہی ہے۔ ترک صدر رجب طیب ایردوآن اس کے حامی خیال کیے جاتے رہے ہیں جبکہ دوسری جانب سعودی عرب اور اُس کے اتحادی مصر و متحدہ عرب امارات اس تنظیم کے شدید مخالفین تھے۔