داعش کی خونریز پیش قدمی، ’خلافت‘ کے قیام کا ایک سال

شامی دارالحکومت دمشق سے موصولہ جرمن نیوز ایجنسی ڈی پی اے کی رپورٹوں کے مطابق دہشت گرد تنظیم اسلامک اسٹیٹ نے، جسے دولت اسلامیہ یا عربی میں ایک سال قبل تک مختصراﹰ داعش بھی کہا جاتا تھا، گزشتہ برس موسم گرما میں مسلسل پیش قدمی کرتے ہوئے عراق اور شام میں اپنے زیر قبضہ علاقوں میں ایک اسلامی ریاست کے قیام کا اعلان کر دیا تھا۔ اِس ریاست میں اُس نے نظام ’خلافت‘ کے نفاذ کا بھی اعلان کیا اور اس گروہ کے سربراہ ابوبکر البغدادی کو ’مسلمانوں کا خلیفہ‘ قرار دیا گیا۔

آئی ایس کی بڑی کامیابیاں اور ناکامیاں

داعش نے اپنی نام نہاد ’مذہبی ریاست‘ کے قیام اور البغدادی کے پہلے ’خلیفہ‘ ہونے کا اعلان 29 جون 2014ء کو کیا تھا۔ اس کے بعد گزشتہ برس آٹھ اگست کے روز امریکی جنگی طیاروں نے شمالی عراق میں اسلامک اسٹیٹ کے ٹھکانوں پر اس وقت اولین فضائی حملے شروع کر دیے تھے، جب اس شدت پسند تنظیم کے جہادیوں نے اپنے زیر قبضہ ایک امریکی صحافی کا سر قلم کر کے نہ صرف اس کی ویڈیو انٹرنیٹ پر جاری کر دی تھی بلکہ پوری دنیا کو سکتے میں بھی ڈال دیا تھا۔

اس کے بعد کے مہینوں میں دولت اسلامیہ کے جنگجوؤں نے نہ صرف دو مزید امریکی شہریوں بلکہ دو برطانوی باشندوں کے سر بھی قلم کر دیے تھے اور ان کے قتل کی ویڈیوز بھی انٹرنیٹ پر جاری کر دی گئی تھیں۔

دولت اسلامیہ کی طرف سے ’خلافت‘ کے اعلان کے قریب ڈھائی ماہ بعد گزشتہ برس 19 ستمبر کو فرانسیسی فضائیہ نے بھی عراق میں اس جہادی تنظیم کے ٹھکانوں پر حملے کیے تھے۔ اس کے بعد کے دنوں میں اسلامک اسٹیٹ کے خلاف امریکا اور اس کے حلیف ملکوں کا ایک باقاعدہ بین الاقوامی اتحاد بھی وجود میں آ گیا تھا، جس میں واشنگٹن کے اتحادی کئی عرب ملک بھی شامل ہو گئے تھے۔ تب ان ملکوں کے جنگی طیاروں کی طرف سے داعش کے عراق میں ٹھکانوں کے ساتھ ساتھ پہلی مرتبہ اس کے شامی سرزمین پر ٹھکانوں کو بھی نشانہ بنایا گیا تھا۔

اسلامک اسٹیٹ کے جہادیوں نے گزشتہ برس اگست میں اپنی سیاسی اور عسکری طاقت کے مرکز عراقی شہر موصل سے شمال مغرب کی طرف کوہ زنجار کے علاقے میں کارروائی کر کے ہزاروں ایزدی اقلیتی باشندوں کو یا تو ہلاک کر دیا تھا یا پھر وہ اپنی جانیں بچانے کے لیے پہاڑوں کی طرف نقل مکانی کر گئے تھے۔

گزشتہ دسمبر میں بین الاقوامی برادری کی عسکری مدد کے ذریعے کرد فائٹرز نے آئی ایس کے جہادیوں کی طرف سے کیا گیا کوہ زنجار کا وہ محاصرہ ختم کرا لیا تھا، جو کئی ماہ تک جاری رہا تھا۔

پھر اس سال جنوری میں، جب داعش کے عسکریت پسند ترکی کے ساتھ سرحد کے قریب شامی شہر کوبانی کے بعض حصوں پر قابض ہو چکے تھے، داعش کے مخالف کرد جنگجوؤں کی اس دہشت گرد گروپ کے جہادیوں کے ساتھ شدید جھڑپیں ہوئیں، اور کرد فائٹر بالآخر آئی ایس کے شدت پسندوں کو کوبانی کے مقبوضہ علاقوں سے نکالنے میں کامیاب ہو گئے۔

اس کے بعد اس سال فروری میں داعش کے عسکریت پسندوں نے انٹرنیٹ پر ایک ایسی ویڈیو جاری کر دی، جس میں اس گروپ کے جہادیوں کے زیر قبضہ اردن کی فضائیہ کے ایک پائلٹ کو لوہے کے ایک پنجرے میں بند کر کے پٹرول چھڑک کر زندہ جلا دیا گیا تھا۔ اردن کے اس یرغمالی پائلٹ کے زندہ جلائے جانے سے قبل اسلامک اسٹیٹ کے انتہا پسندوں نے اپنے زیر قبضہ دو جاپانی یرغمالیوں کو قتل کر کے ان کی ہلاکت کی ویڈیو بھی انٹرنیٹ پر جاری کر دی تھی۔

اس سال مارچ میں عراقی سکیورٹی فورسز بغداد سے قریب 100 کلومیٹر مغرب کی طرف رمادی کے شہر کو آئی ایس کے قبضے سے چھڑانے میں کامیاب ہو گئیں اور اس دوران وہاں ہونے والی انتہائی ہلاکت خیز لڑائی سے بچنے کے لیے ہزارہا عراقی شہریوں کو اپنے گھروں سے رخصت ہونا پڑا۔

رمادی پر عراقی دستوں کے قبضے کے بعد داعش کے جنگجوؤں نے اس شہر کو دوبارہ اپنے کنٹرول میں لینے کی کوششیں ترک نہ کیں اور مئی میں اس گروہ کے مسلح جہادی ایک بار پھر اس شہر پر پوری طرح قابض ہو گئے۔ لیکن اسی دوران مغربی دنیا سے عسکری تربیت اور ہتھیار حاصل کرنے والے کرد جنگجو شمالی شام میں اسلامک اسٹیٹ کے زیر قبضہ چند علاقے دوبارہ اپنے کنٹرول میں لینے میں کامیاب ہو گئے۔

اس مہینے کے اوائل میں داعش نے انٹرنیٹ پر دوبارہ ایک نئی ویڈیو جاری کی، جس میں یہ دکھایا گیا تھا کہ اس دہشت گرد تنظیم کے جہادی اپنے زیر قبضہ یرغمالیوں کو قتل کرنے کے لیے کس کس طرح کے سفاکانہ طریقے استعمال کرتے ہیں۔

اس مہینے کی 26 تاریخ کو اس جہادی گروپ کے ایک خود کش حملہ آور نے خلیجی عرب ریاست کویت میں نماز جمعہ کے وقت کویٹ سٹی میں شیعہ مسلمانوں کی ایک مسجد میں خود کش دھماکا کیا، جو 27 نمازیوں کی ہلاکت اور درجنوں دیگر کے زخمی ہونے کا سبب بنا۔ یہ حملہ کویت میں داعش کا پہلا خود کش بم حملہ تھا۔

جس روز کویت میں خود کش بم حملہ کیا گیا، اسی دن افریقی عرب ملک تیونس میں بھی آئی ایس کے حامیوں نے ایک مشہور ساحلی تعطیلاتی مقام سوسہ میں سیاحوں پر ایک ہلاکت خیز حملہ کیا، جو 39 افراد کی موت کی وجہ بنا۔