غیر قانونی شکار، جنگلی حیات کے لیے خطرہ

غیر قانونی شکار کرنے والوں کے ہاتھوں کوئی جانور محفوظ نہیں۔ جنگلی حیات کے تحفظ کے عالمی ادارے WWF کے مطابق افریقی ہاتھیوں کی نسل خاص طور پر خطرے میں ہے۔ صرف گزشتہ دو برس کے دوران کم از کم 60 ہزار افریقی ہاتھی ہلاک کر دیے گئے۔ 100 برس قبل براعظم افریقہ میں ہاتھیوں کی تعداد 50 لاکھ کے قریب تھی جو کم ہو کر اب چار لاکھ 70 ہزار سے چھ لاکھ 90 ہزار کے درمیان رہ گئی ہے۔

ہاتھیوں کو ہلاک کرنے کی سب سے بڑی وجہ ان کے دانت ہوتے ہیں۔ عالمی سطح پر ہاتھی دانت سے بنی اشیاء کی برآمد پر پابندی ہے۔ تاہم گزشتہ برس یعنی 2013ء کے دوران حکام نے 42 ٹن ہاتھی دانت ضبط کیے۔ چین جہاں ہاتھ دانت کی بنی اشیاء کی بہت زیادہ مانگ ہے، وہاں ہاتھی دانت کے بدلے سونا تک دیا جاتا ہے۔ کھدائی کے ذریعے نقش ونگار والی ہاتھی دانت سے بنی اشیاء چین میں امارت کی نشانی سمجھی جاتی ہیں۔

ہاتھیوں کی طرح گینڈے بھی غیر قانونی شکار کے سبب شدید خطرات کا شکار ہیں۔ گینڈے کے تجارتی مقاصد کے لیے شکار اور اس کے جسمانی اجزاء سے بنی اشیاء پر پہلے ہی ایشیا اور افریقہ میں پابندی عائد ہے۔ اس جانور کو کئی طرح کے خطرات کا سامنا ہے۔ شمالی سفید گینڈے کی نسل تو اب تقریباﹰ ختم ہی ہو چکی ہے۔

گینڈے کے جسمانی اعضاء سے بنی اشیاء کے سب سے زیادہ گاہک بھی چین اور دیگر ایشیائی ممالک ہی میں موجود ہیں۔ گینڈے کے سینگ کو روایتی ایشیائی ادویات میں استعمال کیا جاتا ہے، جو بخار حتیٰ کہ کینسر تک کے علاج کا ذریعہ بھی سمجھی جاتی ہیں۔ گینڈے کے سینگ کی قیمت بھی ہاتھی دانت کی طرح کافی زیادہ ہوتی ہے۔

جن جانوروں کی کھال بہت بیش قیمت سمجھی جاتی ہے ان میں شیر کی کھال بھی شامل ہے۔ جنگلی شیروں کی تعداد اب محض 3200 کے قریب رہ گئی ہے۔ 100 برس قبل ان کی تعداد ایک لاکھ کے قریب تھی۔ شیروں کے شکار کے بعد تیار کردہ مصنوعات کی فروخت پر پابندی 1975ء میں عائد کی گئی تھی۔ غیر قانونی شکار کے علاوہ جنگلات کا کم ہوتا ہوا رقبہ بھی ان شیروں کے لیے ایک بڑا خطرہ ہے۔

ریچھ بھی غیر قانونی شکاریوں کے ہاتھوں محفوظ نہیں ہیں۔ ان کے جسمانی اعضاء کو نہ صرف بطور ٹرافی استعمال کیا جاتا ہے بلکہ ان کے بعض اعضاء ایشیائی ادویات میں بھی استعمال کیے جاتے ہیں۔ عام طور پر ریچھ کے شکار پر پابندی عائد نہیں ہے۔

قطبی ریچھ کی نسل کو سب سے بڑا خطرہ ماحولیاتی تبدیلیوں سے ہے۔ قطب شمالی پر پگھلتی ہوئی برف کے باعث ان کا رہائشی علاقہ سکڑتا جا رہا ہے۔ اس وقت ان کی تعداد 20 سے 25 ہزار کے قریب ہے۔ دنیا بھر میں ہر سال قریب 700 قطبی ریچھوں کا شکار کیا جاتا ہے۔

پہاڑی گوریلا جانوروں کی ان اقسام میں شامل ہے جو ناپید ہو جانے کے شدید خطرات سے دو چار ہیں۔ ان کی نسل اگلے 15 برسوں کے دوران بالکل ختم بھی ہو سکتی ہے۔ بندروں اور گوریلوں کا شکار عام طور پر ان کے گوشت کے لیے کیا جاتا ہے۔ بعض مقامی لوگوں کا اعتقاد ہے کہ گوریلے کا گوشت کھانے سے ان میں گوریلوں جیسی طاقت پیدا ہو سکتی ہے۔

مگر مچھ شکار کیے جانے کے باعث لمبے عرصے سے معدومیت کے خطرے دو چار ہیں۔ مگر مچھ کی کھال کافی زیادہ پسند کی جاتی ہے۔ تاہم اچھی بات یہ ہے کہ اب اس جانور کو خطرے سے بچا لیا گیا ہے۔ مگر مچھوں کی فارمنگ کے ذریعے پیداوار بڑھا کر اس کی کھال کی صنعت کی ضرورت پوری کی جا رہی ہے۔

یورپ میں ہجرت کرنے والے پرندوں کو سب سے بڑا خطرہ غیر قانونی شکاریوں سے لاحق ہوتا ہے۔ افریقہ سے واپس آنے والے پرندوں کو یا تو شکار کر لیا جاتا ہے یا پھر بڑے بڑے جالوں کے ذریعے پکڑ لیا جاتا ہے۔ قدرتی ماحول کے تحفظ کی جرمن تنظیم NABU کے مطابق افزائش نسل کے لیے ہجرت کرنے والے پرندوں کی بہت سے اقسام خطرات کا شکار ہیں۔