فرنچ اوپن: پہلے راؤنڈ سے اپ سیٹ کا سلسلہ شروع

ٹینس کھیل کے ایک سال میں چار بڑے ٹورنامنٹ منعقد کیے جاتے ہیں اور یہ گرینڈ سلیم کہلاتے ہیں۔ پہلا ٹورنامنٹ آسٹریلین اوپن ہے اور اُس کے فاتح سوئٹزرلینڈ سے تعلق رکھنے والے اسٹانسلاس واورِینکا تھے، وہ کل پیر کے روز فرنچ اوپن میں پہلے راؤنڈ کا میچ ہار گئے۔ واورِینکا عالمی درجہ بندی میں تیسری پوزیشن رکھتے ہیں۔ اُن کو عالمی نمبر41 گولیمارو گارسیا لوپیز نے چار سیٹ کے میچ میں زوردار مقابلے کے بعد ہرایا۔ لوپیز کا تعلق اسپین سے ہے۔ فرنچ اوپن کے شروع ہونے سے قبل واورِینکا کے بارے میں اندازہ لگایا گیا تھا کہ وہ سیمی فائنل تک رسائی حاصل کر لیں گے۔

پہلے راؤنڈ میں مردوں کے سنگلز مقابلوں میں واورِینکا کی شکست کو خاصا بڑا اپ سیٹ قرار دیا گیا ہے۔ پہلے دن واورِینکا کے علاوہ عالمی نمبر 9 کئی نِشیکوری کی ہار کو بھی کسی حد تک اپ سیٹ قرار دیا گیا ہے۔ جاپان سے تعلق رکھنے والے نِشیکوری کو یورپ ملک سلوواکیہ کے مارٹن کلیزان نے تین سیٹ کے میچ میں ہرایا۔ اپ سیٹ کے زمزے میں آنے والا ایک اور میچ پوسپیسیل اور گیباشولی کا تھا۔ عالمی نمبر 30 واسیک پوسپیسیل کو روسی کھلاڑی تیمُوراز گیباشولی سے شکست کا سامنا رہا۔ خواتین سنگلز مقابلوں میں سے اطالوی کھلاڑی روبیرتا وِنچی اپنا میچ ہار کر ٹورنامنٹ سے باہر ہوگئی ہیں۔ وِنچی کا تعلق یورپی ملک اٹلی سے ہے اور وہ ڈبلز میں سارا ایرانی کی ساتھی ہیں۔

فرنچ اوپن کے پہلے دن مردوں کے سنگلز مقابلوں میں عالمی نمبر ایک رافائل نادل اور عالمی نمبر دو نوواک جوکووچ نے اپنے اپنے میچ جیت کر دوسرے راؤنڈ کے لیے کوالیفائی کر لیا ہے۔ خواتین سنگلز میچز میں سے چیک جمہوریہ کی پیٹرا کویٹووا اپنا میچ جیت کر اگلے مرحلے میں پہنچ گئی ہیں۔ روس سے تعلق رکھنے والی ماریا شاراپووا کو بھی پہلے راؤنڈ میں کامیابی حاصل ہوئی۔ وہ گزشتہ چند مہینوں کے دوران مختلف انجریز کی شکار رہنے کی وجہ سے عالمی درجہ بندی میں اب ساتویں پوزیشن پر پہنچ گئی ہیں۔ جرمن کھلاڑی زابینے لیزیکی بھی دوسرے مرحلے میں داخل ہو گئی ہیں۔

فرانسیسی دارالحکومت پیرس کے نواح میں واقع ٹینس اسپورٹس کمپلیکس میں کھیلا جانے والا فرنچ اوپن ٹینس کا ایک انتہائی معتبر ٹورنامنٹ تصور کیا جاتا ہے۔ یہ مٹی کے سخت کورٹ پر کھیلا جاتا ہے۔ پچیس مئی سے شروع ہونے والے اس ٹورنامنٹ کا فائنل آٹھ جون کو کھیلا جائے گا۔ روایت کے مطابق مردوں کی سنگلز چیمپئن شپ پر ٹورنامنٹ کا اختتام ہوتا ہے اور یہ آخری دِن کھیلا جاتا ہے۔ ویمن چیمپئن شپ سات جون کو ہو گی۔ رواں برس کے فرنچ اوپن کا فیورٹ ہسپانوی کھلاڑی نادل کو قرار دیا جا رہا ہے۔ اسی طرح خواتین میں امریکی اسٹار سیرینا ولیمز کو فیورٹ سمجھا جا رہا ہے۔ پہلے راؤنڈ میں سیرینا ولیمز نے فرانس کی علیزے رِم کو نہایت آسانی سے ہرایا ہے۔