مالی کی ثقافتی میراث: نقصانات اندازوں سے کہیں زیادہ

عالمی ادارے کے ماہرین کی اس ٹیم نے مالی میں وہاں کے ثقافتی ورثے کو پہنچنے والے نقصانات کا اندازہ لگانے کا کام اقوام متحدہ کے تعلیمی، سائنسی اور ثقافتی ادارے یونیسکو کی سربراہی میں کیا۔ نیویارک سے ملنے والی رپورٹوں کے مطابق ان ماہرین نے اپنی ایک رپورٹ میں کہا ہے کہ مالی میں بدامنی اور عسکریت پسندوں کے ہاتھوں تباہ کاریوں سے سب سے زیادہ نقصان تاریخی شہر ٹمبکٹو کو پہنچا۔ ٹمبکٹو میں عسکریت پسندوں کی کارروائیوں کے دوران 16 مزار مکمل طور پر تباہ کر دیے گئے اور چار ہزار سے زائد تاریخی مسودے اور دستاویزات یا تو تباہ کر دی گئیں یا گم ہو گئیں۔

اقوام متحدہ کے مالی میں ثقافتی میراث کو پہنچنے والے نقصانات کا اندازہ لگانے والے مشن کی سربراہی لازارے ایلوندُو اسومو نے کی۔ اسومو کا تعلق یونیسکو کے عالمی ثقافتی میراث کے مرکز یا ورلڈ ہیریٹیج سینٹر سے ہے۔ انہوں نے نیویارک میں بتایا کہ ٹمبکٹو میں تباہ شدہ تاریخی مقامات اور عمارات کے ایک حالیہ دورے سے ثابت ہو گیا ہے کہ یہ ثقافتی نقصانات پریشان کن حد تک زیادہ ہیں۔

ورلڈ ہیریٹیج سینٹر کے اسومو نے کہا کہ مالی کی ثقافتی میراث کو خاص طور پر ملک کے شمال میں گزشتہ برس اور اس سال کے شروع میں جو نقصان پہنچایا گیا، وہ اب تک کے تخمینوں سے بہت زیادہ ہے۔ مالی کے شمال میں اس ثقافتی ورثے کو ٹمبکٹو پر قبضہ کرنے والے عسکریت پسند باغیوں نے تباہ کر دیا تھا۔

لازارے ایلوندُو اسومو نے کہا، ’ہمارے ماہرین نے ٹمبکٹو میں چودہ ایسے مزارات کا پتہ چلایا جو یونیسکو کی عالمی ثقافتی ورثے کی فہرست میں شامل تھے مگر جنہیں پوری طرح تباہ کر دیا گیا۔ اس کے علاوہ Djingareyber کی تاریخی مسجد سے ملحقہ دو دیگر قدیم عمارتیں بھی تباہ کر دی گئیں‘۔ ٹمبکٹو میں یہ مسجد سن 1327ء میں تعمیر کی گئی تھی۔ وہ صدیوں تک تعلیم و تربیت کا ایک مشہور مرکز رہی تھی اور اب اسے بھی مرمت اور بحالی کے کام کی ضرورت ہے۔

یونیسکو کے ورلڈ ہیریٹیج سینٹر کے اسومو کے بقول اسلام پسند باغیوں نے ٹمبکٹو میں داخلے کے راستے پر بنائے گئی آزادی کی الفاروق یادگار کو بھی منہدم کر دیا۔ ٹمبکٹو ایک ایسا قدیم تجارتی شہر ہے، جو صدیوں تک اسلامی تعلیم و تدریس کا مرکز رہا۔ وہاں صدیوں سے ایک ایسی تاریخی لائبریری بھی قائم تھی، جس میں بہت پرانے اور اونٹ کی کھال پر لکھے گئے بے شمار مسودے بھی موجود تھے۔ یہ مسودے علم فلکیات، طب، تاریخ، مذہبی علوم، گرامر اور جغرافیے جیسے مختلف مضامین کا احاطہ کرتے تھے۔ اس کے علاوہ وہاں کچی مٹی کی بنی ہوئی ایک ایسی مسجد بھی موجود ہے، جو سات سو سال قبل تعمیر کی گئی تھی۔

ان تاریخی مسودوں، قدیم عمارات اور ثقافتی ورثے کو اس وقت شدید نقصان پہنچا، جب القاعدہ سے تعلق رکھنے والے عسکریت پسند 2012ء کے موسم بہار میں ٹمبکٹو میں داخل ہوئے۔ ان عسکریت پسندوں نے اسلام کی اپنی ہی تشریح کے تحت ان سب نوادرات اور باقیات کو تباہ کرنا شروع کر دیا، جو ان کے دعووں کے مطابق ’اصلی مذہبی تعلیمات‘ سے انحراف کا نتیجہ تھے اور ’بدعت‘ کے زمرے میں آتے تھے۔

لازارے ایلوندُو اسومو کے مطابق تاریخی مزارات سے قطع نظر، عسکریت پسندوں نے جن قدیم مسودات کو نقصان پہنچایا، ان کی مرمت اور بحالی شہر کے مذہبی رہنماؤں کی اولین ترجیح ہے۔ تاریخی مسودات کی اس بحالی اور انہیں محفوظ بنانے پر قریب 11 ملین ڈالر لاگت آئے گی۔ انہوں نے کہا کہ ان رقوم کے کچھ حصے کا بندوبست فوری طور پر کیا جانا چاہیے تاکہ تاریخی مسودوں کی بحالی کا کام شروع کیا جا سکے۔

ij / mm (AP)