مصر: الیکشن وقت پر، نیا وزیر اعظم نامزد

مصر کی حکمران عسکری کونسل نے معزول صدر حسنی مبارک کے دور کے ایک سابق وزیر اعظم کو سویلین حکومت کا سربراہ مقررکیا ہے۔ نئے وزیر اعظم کمال الجنزوری ہوں گے۔ انہوں نے وزارت عظمیٰ کا منصب سنبھالنے کی فوجی حکومت کی پیشکش کو قبول کر لیا ہے۔ الجنزوری سن 1996سے 1999 تک مصر کے وزیر اعظم رہ چکے ہیں۔ وزیر اعظم کے منصب کو قبول کرنے سے قبل الجنزوری نے فوجی کونسل کے سربراہ فیلڈ مارشل محمد حسین طنطاوی سے ملاقات بھی کی۔ نئے وزیر اعظم عصام عبدالعزیر شرف کی جگہ منصب سنبھالیں گے۔ مظاہروں کی وجہ سےعصام حکومت مستعفی ہو چکی ہے۔

 التحریر چوک کے مظاہرین نے سویلن حکومت میں تبدیلی کو قبول نہ کرتے ہوئے آج جمعے کے روز ایک اور احتجاجی ریلی نکالنے کا اعلان کیا ہے۔ مصر کی مزدوروں کی آزاد تنظیم ٹریڈ یونین فیڈریشن نے آج جمعے کی ریلی میں شرکت کا اعلان کیا ہے۔ دائیں بازو کی ایک اور لیبر یونین نے بھی آج کی ریلی میں پوری قوت سے شرکت کا فیصلہ کیا ہے۔

فوجی کونسل کے ساتھ ملاقات کرنے والی سیاسی جماعتوں نے التحریر چوک کے مظاہرین سے معافی کا اعلان کرتے ہوئے میٹنگ میں شریک ہونے پر افسوس کا اظہار کیا ہے۔ بعض طالب علم مظاہرین نے الجنزوری کی نامزدگی کو بھی مسترد کرتے ہوئے کہا کہ وہ نوجوان قیادت کے حامی ہیں اور بزرگ لیڈروں کی سیاست ختم ہو چکی ہے۔

مظاہرین اب فیلڈ مارشل محمد حسین طنطاوی کے خلاف مقدمے کا مطالبہ کر رہے ہیں۔ طنظاوی بیس برس تک حسنی مبارک کے وزیر دفاع بھی رہ چکے ہیں۔ مصر کے تازہ مظاہروں میں اب تک انتالیس افراد ہلاک ہو چکے ہیں۔

مظاہرین کے غصے کو کم کرنے کے لیے فوجی کونسل نے پیر کے روز سے شروع ہونے والے انتخابات کو مؤخر کرنے کی مختلف آراؤں کو رد کرتے ہوئے انہیں وقت مقررہ پر  ہی کروانے کا اعلان کیا ہے۔ عصام شرف حکومت کے وزیر داخلہ منصور العیسوی نے 28 نومبر کو ہونے والے انتخابات ملتوی کرنے کی تجویز دی تھی۔ مصر میں تین ماہ کے عرصے پر محیط انتخابی عمل کا آغاز اگلی پیر سے ہو رہا ہے۔ مبصرین کے خیال میں انتخابات میں بہتر کارکردگی کا مظاہرہ مذہبی جماعت اخوان المسلمین اور فوج کی حامی جماعتوں کی جانب سے متوقع ہے۔ اس باعث یہ دونوں طبقے انتخابات کے اٹھائیس تاریخ سے انعقاد کے حامی ہیں۔

مصر میں جاری مظاہروں نے اسٹاک مارکیٹ کو بھی اپنی لپیٹ میں لے رکھا ہے۔ حصص کی قیمتیں گر رہی ہیں۔ اس کے علاوہ مصری کرنسی پاؤنڈ کی قدر میں سن 2005 کے بعد سب سے زیادہ کمی ریکارڈ کی گئی ہے۔ ریٹنگ ایجنسی اسٹیڈرڈ اینڈ پُوورز نے مصر کی ریٹنگ کو ڈبل بی (BB) سے سنگل بی (B) کر دیا ہے۔

رپورٹ:  عابد حسین

ادارت:  عاطف بلوچ