مصر: سن 2013 کے دھرنے میں شرکت پر پچھتر افراد کو سزائے موت
8 ستمبر 2018
عدالت کی جانب سے کالعدم تنظیم اخوان المسلمون کے حامیوں کو دی گئی ان سزاؤں سے پہلے قریب سات سو افراد پر مقدمات چلائے گئے تھے۔ ان افراد پر قاہرہ کے ربہ ادعاویہ اسکوائر میں ایک دھرنے کے دوران قتل اور تشدد کو ابھارنے کے الزامات عائد کیے گئے تھے۔
مصری حکومت کا کہنا ہے کہ سن 2013 کے اس دھرنے میں زیادہ تر مظاہرین مسلح تھے اور پر تشدد جھڑپوں میں سکیورٹی فورسز کے آٹھ اہلکار بھی ہلاک ہوئے تھے۔ اس سے قبل چالیس پولیس اہلکاروں کی ہلاکتیں رپورٹ کی گئی تھیں۔
دوسری جانب انسانی حقوق کی تنظیموں کا کہنا ہے کہ سن 2011 میں مصر کی تاریخی بغاوت کے تناظر میں ہونے والے اس پُر تشدد دھرنے میں آٹھ سو مظاہرین ہلاک ہوئے تھے۔
انسانی حقوق کے گروپ ایمنسٹی انٹرنیشنل نے آج بروز ہفتہ مصری عدالت کی جانب سے ديے جانے والے اس فیصلے کو ’شرمناک‘ قرار دیا ہے۔ قاہرہ میں ایک فوجداری عدالت کے اس فیصلے میں اخوان المسلمون کے کئی اہم لیڈران کو پھانسی کی سزا سنائی گئی ہے۔
عدالتی ذرائع نے کسی قسم کی وضاحت کیے بغیر بتایا ہے کہ پانچ ایسے افراد کے مقدمات بند کر دیے گئے ہیں جن کا سماعت کے دوران جیل ہی میں انتقال ہو گیا تھا۔
عدالت نے ایک ایوارڈ یافتہ فوٹو جرنلسٹ محمود ابو زید کو بھی پانچ سال قید کی سزا سنائی تھی تاہم عدالتی ذرائع کا کہنا ہے کہ اسے جلد ہی رہا کر دیا جائے گا کیونکہ وہ مقدمے کی سماعت کے دوران جیل میں ہی پانچ سال گزار چکے ہیں۔
ابو زید پر کالعدم تنظیم سے منسلک ہونے اور اسلحہ رکھنے کے الزامات تھے۔
ص ح / ع س / نیوز ایجنسی