نیو یارک میں فائرنگ، دو پولیس اہلکار ہلاک

خبر رساں ادارے روئٹرز نے امریکی روزنامے نیو یارک ٹائمز کے حوالے سے بتایا ہے کہ ہفتے کے دن حملہ آور نے پولیس اہلکاروں کو بروکلین میں اس وقت نشانہ بنایا، جب وہ گشت کے دوران اپنی گاڑی میں بیٹھے ہوئے تھے۔ نیو یارک پولیس ڈیپارٹمنٹ کے نائب سربراہ کم روئسٹر کے مطابق ہلاک شدہ پولیس اہلکاروں کو بظاہر گولیاں ان کے جسم کے اوپری حصے پر لگی ہیں۔

نیو یارک ٹائمز نے روئسٹر کے حوالے مزید بتایا کہ فائرنگ کے بعد حملہ آور قریبی ٹرین اسٹیشن کی طرف فرار ہو گیا اور بعد ازاں اس نے اپنے سر میں گولی مار کر خود کشی کر لی۔ پولیس نے اس واقعے کے بارے میں زیادہ تفصیلات جاری نہیں کی ہیں لیکن یہ ضرور بتایا ہے کہ جب حملہ آور نے فائرنگ کی تو اس وقت پولیس اہلکار اس کے ساتھ کسی قسم کے رابطے میں نہیں تھے۔

دوسری طرف محکمہء پولیس کے ترجمان نے بتایا ہے کہ حملہ آور نے ہفتے کے دن ہی نہ صرف اپنی سابقہ گرل فرینڈ کو مبینہ طور پر گولی مار کر زخمی کر دیا تھا بلکہ اس نے اپنے انسٹا گرام کے اکاؤنٹ پر پولیس مخالفت پوسٹ بھی شائع کی تھی۔

روئٹرز سے گفتگو کرتے ہوئے ترجمان نے بتایا ہے کہ حملہ آور کی عمر اٹھائیس برس تھی اور اس کی لاش کو بروکلین ہسپتال سینٹر منتقل کر دیا گیا ہے۔ انہوں نے مزید کہا کہ اس سے ہتھیار بھی برآمد کر لیا گیا ہے، جس سے اس نے مشتبہ طور پر فائرنگ کی ہے۔

یہ امر اہم ہے کہ بروکلین کے علاقے میں ایک سفید فام پولیس اہلکار کے ہاتھوں نہتے سیاہ فام ایرک گارنر کی ہلاکت کے بعد بالخصوص نیو یارک شہر میں ایک غم و غصہ نمایاں ہے۔ وہاں صورتحال اس وقت مزید پرتناؤ ہو گئی تھی جب گرینڈ جیوری نے ایرک گارنر کو ہلاک کرنے کے واقعے پر پولیس اہلکار پر فرد جرم عائد نہ کرنے کا فیصلہ کیا تھا۔ تاہم ابھی تک یہ واضح نہیں ہے کہ پولیس اہلکاروں پر فائرنگ کا واقعہ موجودہ کشیدہ صورتحال کا نتیجہ ہے۔

ایک عینی شاہد نے امریکی نشریاتی ادارے سی این این کو بتایا ہے کہ جہاں پولیس اہلکاروں پر فائرنگ کی گئی ہے، وہاں زیادہ تر سیاہ فام کمیونٹی ہی آباد ہے اور ایرک گارنر کے واقعے کے بعد وہاں صورتحال کشیدہ ہی ہے۔ ٹیلی وژن پر دکھائی گئی فوٹیج کے مطابق جہاں ہفتے کے دن فائرنگ ہوئی ہے، پولیس نے وہاں ناکہ بندی کر دی ہے۔ نیو یارک ٹائمز کے مطابق نیو یارک شہر میں آخری مرتبہ 2011ء میں پولیس اہلکاروں پر فائرنگ کا واقعہ رونما ہوا تھا، جس میں ایک اہلکار مارا گیا تھا۔