ٹینس کا راجہ، راجر فیڈرر بین الاقوامی مقابلوں سے ریٹائر

ٹینس کے عالمی میدانوں پر دو دہائیوں سے زیادہ عرصے تک راج کرنے والےکھلاڑی راجر فیڈرر نے اگلے ہفتے بین الاقوامی مقابلوں سے ریٹائر ہونے کا اعلان کر دیا ہے۔ اس سوئس ٹینس لیجنڈ کی طرف سے جمعرات پندرہ ستمبر کے روز کیے گئے ریٹائرمنٹ کے اعلان نے دنیا بھر میں ان کے مداحوں کے ان خدشات کو درست ثابت کر دیا، جو انہیں اپنے اس محبوب کھلاڑی کے انٹرنیشنل ٹینس کو جلد خیر باد کہہ دینے کے حوالے سے درپیش تھے۔

ٹوئٹر پر ’راجر فيڈرر جاگ اٹھو‘ کيوں ٹرينڈ کر رہا ہے؟

فیڈرر نے کہا کہ لندن میں اگلے ہفتے ہونے والا لیور کپ ان کے لیے پیشہ وارانہ مقابلوں کا آخری معرکہ ہوگا۔ 41 سالہ راجر فیڈرر  نے اب تک 20 گرینڈ سلیم ٹائٹل جیتے ہیں اور کئی ماہرین انہیں ٹینس کا آج تک کا بہترین کھلاڑی سمجھتے ہیں۔ انہوں نے گزشتہ سال کے ومبلڈن مقابلوں کے بعد سے کوئی میچ نہیں کھیلا۔ انسٹاگرام پر ایک پوسٹ میں فیڈرر کا کہنا تھا، ''آپ میں سے بہت سے لوگ جانتے ہیں کہ گزشتہ تین سالوں میں مجھے چوٹوں اور سرجریوں کی شکل میں چیلنجز درپیش رہے۔‘‘

فیڈرر نے مزید لکھا، ''میں نے مکمل مسابقتی فارم میں واپس آنے کے لیے سخت محنت کی ہے، لیکن میں اپنے جسمانی  صلاحیتوں اور حدود سے بھی واقف ہوں اور حال ہی میں میرے لیے یہ پیغام بہت واضح رہا ہے۔ میری عمر اب 41 سال ہے۔‘‘ اپنے مداحوں سے مخاطب ہوتے ہوئے فیڈرر کا کہنا تھا، ''میں نے 24 سال کے دوران 1500 سے زائد میچ کھیلے ہیں۔ ٹینس نے میرے ساتھ اس سے بھی زیادہ فراخ دلانہ سلوک کیا ہے جتنا میں نے کبھی خواب میں بھی نہیں سوچا تھا۔ اب مجھے یہ تسلیم کرنا ہوگا کہ میرے مسابقتی کیریئر کے خاتمے کا وقت آ گیا ہے۔ اگلے ہفتے لندن میں لیور کپ میرا آخری اے ٹی پی ایونٹ ہوگا۔ میں مستقبل میں مزید ٹینس کھیلوں گا، یقیناﹰ، لیکن صرف کسی گرینڈ سلیم کے لیے یا دورے کے دوران نہیں۔‘‘

2003 ء میں ومبلڈن میں اپنا پہلا گرینڈ سلیم ٹائٹل جیتنے کے بعد سے ہی مردوں کے ٹینس مقابلوں کی دنیا پر راج کرنے والے فیڈرر حالیہ برسوں میں کئی طرح کی چوٹوں سے پریشان رہے ہیں۔ گزشتہ دو برسوں میں ان کے گھٹنے کے تین آپریشن ہوئے ہیں اور ان کا آخری بین الاقوامی مقابلہ 2021 کے ومبلڈن میں پولینڈ کے ہوبرٹ ہرکاز کے خلاف کوارٹر فائنل میں شکست پر منتج ہوا تھا۔

فیڈرر نے اعلان کیا تھا کہ  وہ بین الاقوامی ٹینس میں واپسی کے لیے طویل عرصے تک اپنے حریف رہنے والے مگر دوست ہسپانوی کھلاڑی رافائل نادال کے ساتھ مل کر لندن میں لیور کپ میں مردوں کے ڈبلز مقابلوں میں حصہ لینا چاہتے ہیں۔ فیڈرر نے اپنی ہوم گراؤنڈ بازل شہر میں منعقد کیے جانے والے سوئس ان ڈور ٹورنامنٹ میں کھیلنے کا منصوبہ بھی بنایا تھا۔

ش ر / م م (اے ایف پی، روئٹرز)