ٹینس کی دنیا کا سب سے بڑا اپ سیٹ: جوکووچ خاچانوف سے ہار گئے

اتوار چار نومبر کے روز پیرس میں اس ٹورنامنٹ کے مردوں کے سنگلز فائنل میں بائیس سالہ روسی کھلاڑی خاچانوف نے صرف دو سیٹ کے ایک میچ میں نہ صرف جوکووچ کو سات پانچ اور چھ چار سے ہرا دیا بلکہ ساتھ ہی سربیا کے عالمی سطح کے اس کھلاڑی کے بین الاقوامی ٹینس پر طویل عرصے سے چلے آ رہے غلبے کو بھی ختم کر دیا۔

خاچانوف کے بارے میں ٹینس کے کئی ماہر تجزیہ کار یہ کہتے رہے تھے کہ ان میں ایک بہت ہی باصلاحیت نوجوان کھلاڑی کی تمام خصوصیات موجود ہیں۔ لیکن یہ روسی کھلاڑی نوواک جوکووچ کو بھی ہرا دیں گے، یہ کسی نے بھی نہیں سوچا تھا۔ اس لیے بھی کہ جوکووچ تین ماہ سے اور اپنے گزشتہ 22 میچوں میں مسلسل ناقابل شکست چلے آ رہے تھے۔

جوکووچ کے بارے میں یہ امید بھی کی جا رہی تھی کہ وہ آج نہ صرف پیرس ماسٹرز ٹائٹل ایک بار پھر جیت سکتے تھے بلکہ یوں کل پیر کے دن وہ ایک بار پھر عالمی نمبر ایک کھلاڑی بن جاتے۔ اگر ایسا ہوتا تو جوکووچ کے لیے پیرس ماسٹرز کا یہ ریکارڈ پانچواں ٹائٹل ہوتا۔ لیکن خاچانوف نے جوکووچ کو صرف ایک گھنٹہ اور 37 منٹ تک جاری رہنے والے میچ میں چت کر دیا۔

خاچانوف کے کھیل کی ایک خاص بات یہ ہے کہ ایک تو ان کا قد چھ فٹ چھ انچ ہے، جسے ٹینس کے تبصرہ نگار اس کھیل میں ’پہاڑ جتنا اونچا‘ قرار دیتے ہیں اور دوسرے یہ کہ ان کی شاٹس اور سروس دونوں انتہائی تیز رفتار اور طاقت ور ہوتی ہیں۔

نوواک جوکووچ نے کل ہفتے کے روز اس ٹورنامنٹ کے سیمی فائنل میں سوئٹزرلینڈ کے راجر فیڈرر کو ایک ایسے میچ میں ہرایا تھا، جو تین گھنٹے تک جاری رہا تھا۔ جوکووچ پر کل کے اس میچ کی وجہ سے معمولی سی تھکن کے آثار بھی تھے، لیکن جس طرح خاچانوف نے اس سرب کھلاڑی کو ششدر کر دیا، اس کے لیے تبصرہ نگار خاچانوف کے جارحانہ کھیل کو ہی واحد وجہ قرار دے رہے ہیں۔

خاچانوف کے لیے یہ فتح ان کی اس ہفتے میں مسلسل چوتھی فتح ہے، جس میں انہوں نے دنیا کے دس بہترین کھلاڑیوں میں سے ایک کو ’واپس گھر بھیج دیا‘۔ خاچانوف کا کھیل ان کے بچپن کے ہیرو اور ماضی کے روسی کھلاڑی مرات سافین سے بہت ملتا جلتا ہے۔ اتفاق کی بات یہ بھی ہے کہ سافین ہی وہ کھلاڑی تھے، جنہوں نے اپنے ملک روس کے لیے آخری مرتبہ پیرس ماسٹرز ٹائٹل جیتا تھا۔

م م / ع ح / روئٹرز