پاکستان میں طوفانی موسم کی تباہ کاریاں، چونتیس افراد ہلاک

پولیس اہلکار ثاقب محمود کے مطابق شدید آندھی اور بارش کی وجہ سے صرف دارالحکومت اسلام آباد میں دس افراد ہلاک اور پچاس سے زائد زخمی ہوئے۔ اطلاعات کے مطابق زیادہ تر متاثرین درختوں اور سائن بورڈز کے گرنے کی وجہ سے ہلاک یا زخمی ہوئے۔

اطلاعات کے مطابق گزشتہ شب چلنے والی طوفانی ہواؤں کی فی گھنٹہ رفتار قریب 150 کلومیٹر تک رہی۔ ہنگامی حالات میں فوری مدد کے ذمے دار ادارے کے ایک اہلکار فاروق بٹ کا جرمن نیوز ایجنسی ڈی پی اے سے گفتگو کرتے ہوئے کہنا تھا کہ راولپنڈی میں کم از کم سولہ افراد ہلاک ہوئے جبکہ اس شہر میں 65 کے قریب زخمی افراد کو ہسپتالوں میں لایا گیا۔

پاکستان کے شمال مغربی صوبے خیبر پختونخوا میں صوبائی ریسکیو ایجنسی کے ترجمان بلال احمد فیضی نے بتایا کہ وہاں اس طوفان کی وجہ سے آٹھ افراد ہلاک ہوئے جبکہ تیس کے قریب زخمیوں کا علاج جاری ہے۔

فیضی کا مزید کہنا تھا کہ تیز ہواؤں کی وجہ سے بجلی کے بے شمار کھمبے اپنی جڑوں سے اکھڑ گئے اور اسی وجہ سے صوبے کے کئی حصوں میں گزشتہ بارہ گھنٹوں سے بجلی کی فراہمی معطل ہے۔

دوسری جانب پاکستانی محکمہ موسمیات نے ملک کے شمال مغربی علاقوں میں مزید بارشوں اور تیز ہواؤں کی پیش گوئی کی ہے۔ گزشتہ برس صوبہ خیبر پختونخوا میں آنے والے طوفان کی وجہ سے کم از کم چوالیس افراد ہلاک ہو گئے تھے۔ اس کے بعد پاکستان کے پالیسی سازوں پر اس دلیل کے ساتھ تنقید میں اضافہ ہو گیا تھا کہ وہ ماحولیاتی تبدیلیوں سے نمٹنے کے لیے مناسب اقدامات نہیں کر رہے۔

پاکستانی محکمہ موسمیات کے اہلکار محمد حنیف کا کہنا تھا، ’’اس طوفان کے بعد پالیسی سازوں کی آنکھیں کھل جا نی چاہییں۔‘‘

اسلام آباد میں قائم ایک غیر سرکاری ادارے ’پتن‘ کے قومی رابطہ کار سرور باری کا کہنا ہے کہ ملک میں خشک سالی بھی ایک مسئلہ ہے اور ساتھ ہی اگر حکومت نے موسمی طوفانوں اور زمینی تودے گرنےکا سبب بننے والی بارشوں سے نمٹنے کے لیے ایسی آفات کے شکار علاقوں میں بسنے والوں کی مدد کے لیے کافی اقدامات نہ کیے تو آئندہ چند سالوں میں اندرون ملک مہاجرت میں بہت زیادہ اضافہ ہو سکتا ہے۔

ایشیائی ترقیاتی بینک کے اندازوں کے مطابق 2050ء تک پاکستان اور بنگلہ دیش میں ڈھائی ملین سے زائد انسان ایسے مقامات پر زندگی بسر کر رہے ہوں گے جو منفی ماحولیاتی تبدیلیوں کے حوالے سے نہایت خطرناک ہوں گے۔